17.05.2026 | 17:13
Մետրոպոլիտենում առաջացած տեխնիկական խափանումը վերացվել է
Մոսկվան պնդում է, թե Ուկրաինան գիշերը փորձել է հարված հասցնել Կրեմլին
Քաղաքականություն
03.05.2023 | 16:16
ՌԴ նախագահի մամուլի ծառայությունը պնդում է, որ Կիևը փորձել է անօդաչու սարքերով հարվածել Կրեմլին, սակայն հարձակումը հաջողությամբ հետ է մղվել։
«Այս գիշեր Կիևի ռեժիմը անօդաչու թռչող սարքերով փորձ է կատարել հարվածել Ռուսաստանի Դաշնության Նախագահի կրեմլյան նստավայրին»,- ասված է հաղորդագրության մեջ։ ՌԴ ղեկավարի մամուլի ծառայության հաղորդմամբ «Կրեմլի ուղղությամբ երկու անօդաչու թռչող սարքեր են ուղղորդվել»։
«Զինվորականների և հատուկ ծառայությունների կողմից ժամանակին ռադիոլոկացիոն պայքարի համակարգերի կիրառմամբ ձեռնարկված գործողությունների արդյունքում սարքերը շարքից դուրս են բերվել։ Դրանց անկման և Կրեմլի տարածքում բեկորների ցրման հետևանքով զոհեր և նյութական վնասներ չկան», – հաղորդում է մամուլի ծառայությունը։
Նշվում է, որ ՌԴ նախագահ Վլադիմիր Պուտինը չի տուժել և շարունակում է աշխատել սովորական ռեժիմով։
«Ահաբեկչության հետևանքով ՌԴ նախագահը չի տուժել, նրա աշխատանքային գրաֆիկը չի փոխվել և շարունակվում է սովորական ռեժիմով»,- ասվում է հաղորդագրության մեջ։
Պաշտոնական Կիևն առայժմ չի արձագանքել այս մեղադրանքներին, լինելուն պես այն ևս կներկայացնենք։
