14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
«Ղարաբաղի հարցում Թուրքիան և Ռուսաստանը տարբեր ճակատներում են». թուրք վերլուծաբան
Քաղաքականություն
28.06.2018 | 16:31
Ամերիկյան «Brookings» համալսարանի Մերձավոր Արևելքի և Թուրքիայի հարցերով փորձագետ Օմեր Թաշփընարը հարցազրույց է տվել «Deutsche Welle» լրատվամիջոցի թուրքական ծառայությանը: Նա անդրադարձել է ղարաբաղյան հիմնախնդրի հարցում Թուրքիայի և Ռուսաստանի դիրքորոշումների տարբերությանը. փոխանցում է ermenihaber-ը:
«Deutsche Welle» -ի լրագրողը հարց է հնչեցրել.
«Էրդողանը փորձում է այլըտրանք գտնել Արևմուտքին։ Նա ջանքեր է գործադրում Ռուսաստանի հետ մերձենալու համար։ Ինչպես ե՞ք տեսնում ռուս-թուրքական հարաբերությունների ապագան Էրդողանի իշխանության պայմաններում»։
Թուրք վերլուծաբանն ի պատասխան նշել է.
«Ըստ Էության Թուրքիայի և Ռուսաստանի միջև ռազմավարական գործընկերություն չկա, քանի որ, ինչպես տեսնում եք, Ռուսաստանը և Թուրքիան մի շարք հարցերին նույն կերպ չեն նայում։ Նրանք ամենակարևոր հարցերում հակադիր դիրքորոշումներ ունեն։ Օրինակ՝ Էրդողանը Ղրիմի վերաբերյալ անում է այնպիսի հայտարարություններ, որոնք Ռուսաստանին բնավ դուր չեն գալիս։
Ղարաբաղի հարցում ևս Թուրքիան և Ռուսաստանը տարբեր ճակատներում են։ Հունաստանի և Կիպրոսի հարցում Ռուսաստանը ընդհանուր առմամբ ավելի շատ դիրքավորված է հույների օգտին։ Հաճախ անտեսվում են նաև Ռուսաստանի և քրդերի միջև եղած կապերը։ Միացյալ Նահանգները «Քուրդիստանի բանվորական կուսակցությանը» (ՔԲԿ-PKK) համարում են ահաբեկչական կազմակերպություն, իսկ Ռուսաստանը՝ ոչ։ Ճիշտ է, Թուրքիայի «սերը» Ռուսաստանի հանդեպ անպատասխան չէ, բայց միևնույն ժամանակ Թուրքիան դեռ շարունակում է ԱՄՆ-ի հետ կիսել ռազմավարական հայեցակարգ։
