12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Ուկրաինայի խորհրդարանն օրինականացրել է «ռաշիզմ» եզրույթը
Քաղաքականություն
02.05.2023 | 23:02
Ուկրաինայի Գերագույն Ռադան օրենսդրության մեջ ներառել է «ռաշիզմ» եզրույթը՝ ընդունելով «Ռուսաստանի Դաշնության քաղաքական ռեժիմի կողմից ռաշիզմի գաղափարախոսության օգտագործման, ռաշիզմի սկզբունքներն ու գործելակերպը որպես տոտալիտար և մարդատյաց դատապարտելու մասին» որոշումը, գրում է BBC-ի ռուսական ծառայությունը։
Հաղորդվում է, որ Գերագույն Ռադայի պատգամավորները փաստաթղթի տեքստում հավաքել են Ռուսաստանի ներկայիս իշխանությունների սահմանումներն ու բնութագրերը, որոնք տրվել են՝ փորձելով գիտականորեն բացատրել այս երևույթը ինչպես ուկրաինացի, այնպես էլ արևմտյան պատմաբանների, հրապարակախոսների և մշակութաբանների կողմից, և հանգել եզրակացության, որ ռաշիզմը «ժամանակակից ռուսական ֆաշիզմն է»։
«Ռուսաստանի դաժան, չհրահրված պատերազմն Ուկրաինայի դեմ ամբողջ աշխարհին բացել է Վլադիմիր Պուտինի քաղաքական ռեժիմի էությունը՝ որպես նեոկայսերական բռնապետություն, որը հետևում է անցյալի ամենավատ գործելաոճին և մարմնավորում է ֆաշիզմի ու նացիոնալ-սոցիալիզմի գաղափարները ռուսական ֆաշիզմի (ռաշիզմ) ժամանակակից տարբերակում»,- ասվում է բացատրության մեջ։
Հրապարակման մեջ նշվում է, որ «ռաշիզմի մասին Գերագույն Ռադայի կողմից բանաձևի ընդունումը պարզապես ցույց է տալիս այս եզրույթի կիրառման իրողությունը, որն այսօր զարգացել է ինչպես Ուկրաինայի ներսում, այնպես էլ, որոշ չափով, համաշխարհային գիտական քննարկումներում»։
Էմմա Չոբանյան
