26.06.2026 | 22:15
Forbes. Երեմյան ընկերությունների խմբի 20 տարին, 27 բիզնես ուղղությունն ու մեկ տեսլականը
Թուրքիայի ընդդիմությունը ՆԳՆ-ին մեղադրում է ընտրությունների դիտարկման ապօրինի կառույց ստեղծելու մեջ
Քաղաքականություն
02.05.2023 | 21:14
Թուրքիայի ՆԳՆ-ն երկրի Գերագույն ընտրական խորհրդին զուգահեռ ընտրությունների մոնիթորինգի համակարգ է ստեղծել՝ խախտելով ազատ և արդար ընտրությունների սկզբունքները։ Այս մասին հայտարարել է գլխավոր ընդդիմադիր Ժողովրդահանրապետական կուսակցության (CHP) փոխնախագահ Մուհարեմ Էրքեքը, հաղորդում են թուրքական լրատվամիջոցները։
Էրքեքը, որը վերահսկում է CHP-ի իրավական և ընտրական հարցերի հանձնաժողովը, կուսակցության կենտրոնակայանում մամուլի ասուլիս է հրավիրել՝ կապված ընտրությունների օրակարգի հետ։ Նա հայտարարել է, որ բացահայտել են Ներքին գործերի նախարարության կազմում ընտրությունների դիտորդական կառույցի ստեղծումը։
«Ներքին գործերի նախարարությունը բոլոր նահանգապետերին խնդրել է ստեղծել ընտրությունների մոնիթորինգի մոդուլ։ Առնվազն 3 մարդ կնշանակվի մինչև 20,000 բնակչություն ունեցող շրջաններում, առնվազն 5 մարդ՝ 20,000-ից 100,000 բնակչություն ունեցող շրջաններում, և առնվազն 10-ը՝ 100,000-ից ավելի բնակչություն ունեցող շրջաններում։ Ներքին գործերի նախարարը շարունակում է գործել հանցագործության նախարարի պես։ Նրանք զուգահեռ կառույց են ստեղծել։ Մենք պաշտոնյաներին զգուշացնում ենք չհետևել այս անօրինական հրամանին և մասնակից չլինել այս հանցագործությանը»,- ասել է Էրքեքը։
Հիշեցնենք, որ Թուրքիայում նախագահական և խորհրդարանական ընտրությունները նախանշված են մայիսի 14-ին։
Էմմա Չոբանյան
