Ծառայությունների ոլորտում գնաճն ավելի բարձր է, քան մեր թիրախը․ Մարտին Գալստյան․ ՏԵՍԱՆՅՈՒԹ

«Ինչպես աշխարհի շատ երկրներում՝ Հայաստանում ևս նկատում ենք մի ֆենոմեն, երբ կա որոշակի ապրանքների էական գնանկում, որը հիմնականում մի կողմից պայմանավորված է վարվող դրամավարկային քաղաքականությամբ, մյուս կողմից՝ քովիդից հետո արժեշղթաների վերականգնմամբ և առաջարկի ավելացման գործոններով»,-այս մասին այսօր հրավիրված ասուլիսում հայտարարեց ԿԲ նախագահ Մարտին Գալստյանը:

Նրա խոսքով՝ ԱՄՆ-ում, ԵՄ-ում, ՌԴ-ում և Հայաստանում տեսանելի է, որ համաշխարհային պարենային գների նվազման արդյունքում գնաճի զամբյուղի մեջ էական կշիռ ունեցող ապրանքների գները որոշակիորեն նվազման միտում են ցույց տալիս:

Գալստյանն հավելեց, որ գնաճի նվազման երկրորդ պատճառը բազային էֆեկտներն են, քոնի որ անցած արվա ընթացքում երկրում եղել է բավականին բարձր բազա, որի արդյունքում ընթացիկ տարվա ընթացքում գնաճային կոմպոնենտն ապրանքային մասում էապես նվազում է:

ԿԲ նախագահը հայտնեց, որ կառույցն ավելի շատ ուշադրություն է դարձնում ծառայությունների հատվածին կամ կոշտ գներին:
«Այստեղ դեռ կան մի քանի զարգացումներ, որ մեզ բերում են այն մտքին, որ մենք՝ պայքարը գնաճի դեմ դեռևս վերջնականապես չենք հաղթահարել ու հաղթել: Առաջինը՝ արտաքին պահանջարկով պայմանավորված ծառայությունների գների հետևողական աճն է Հայաստանում: Այսինքն՝ եթե ապրանքների պարագայում մենք տեսնում ենք, որ ունենք գնանկումներ՝ բավականին մեծ, որը շատ կարճ ժամանակահատվածում նույնիսկ բերելու է նրան, որ Հայաստանում ընդհանուր գնաճը լինելու է ավելի ցածր, քան ԿԲ-ի թիրախն է, բայց այնուամենայնիվ, մենք տեսնում ենք, որ ծառայությունների ոլորտում գնաճն ավելի բարձր է քան թիրախը: Մենք 6-7-8 % ամսական, տարեկան արտահայտված 12 % գնաճ ունենք որոշակի ծառայությունների մասով»,- նշեց Գալստյանը։

ԿԲ նախագահի դիտարկմամբ՝ այդ միտումը պայմանավորած է արտաքին ուժեղ պահանջարկով, դրան նպաստում է նաև երկրում աշխատավարձերի աճը:

«Աշխատավարձի աճը գերազանցում է, ոչ միայն ՀՆԱ-ի աճի տեմպերն, այլև արտադրողականությանն է էականորեն գերազանցում, ինչն իր մեջ ունի գնաճային էական պոտենցիալ:

Մյուս խնդիրը, որը մեզ թույլ չի տալիս, որ հանգիստ վերաբերվենք գնաճի ֆենոմենին՝ գնաճային սպասումներն են»,- հավելեց Գալստյանը՝ նկատելով որ չնայած դրանք անցած տարվա մակարդակից նվազել են, բայց այնուամենայինից գնաճային սպասումները շարունակում են մնալ բարձր։

Մանրամասները՝ տեսանյութում։