Սեղանին մի լուծում է, որը ենթադրում է Արցախի ճանաչումն Ադրբեջանի կազմում. Հայկ Մամիջանյան․ ՏԵՍԱՆՅՈՒԹ

«Բաքու-Ստեփանակերտ ուղիղ բանակցային գործընթացը չի կարող բխել Արցախի շահերից և ենթադրում է տարածքային կորուստներ՝ հայկական շահերի ոտնահարմամբ»,- Ազգային ժողովում լրագրողների հետ զրույցում ասաց ԱԺ «Պատիվ ունեմ» խմբակցության ղեկավար Հայկ Մամիջանյանը՝ անդրադառնալով Վաշինգտոնում ԱՄՆ-ի հովանու ներքո տեղի ունեցող հայ-ադրբեջանական բանակցություններին՝ Խաղաղության պայմանագրի կնքման օրակարգով։

Պատգամավորի խոսքով՝ Ադրբեջանը մոտենում է իր օրակարգով, որը չի բխում Հայաստանի ու Արցախի շահերից․․․ Չկա այնպիսի մեխանիզմ, որը հնարավորություն կընձեռի տարանջատելով Արցախյան հակամարտությունը հայ-ադրբեջանական հարաբերություններից՝ ստանալ բարենպաստ լուծում. անհնար է:

«Եթե նայեք այսօրվա կառավարիչների խոսույթը՝ բոլորը  փորձում են առաջ տանել հետևյալ թեզը՝  Հայաստանը  որևէ կերպ ներկայացվածություն չունի Արցախում,  Հայաստանի հետ հարց չունեք, գնացեք, Ստեփանակերտի հետ խոսեք:  Հիմա հրապարակային ասում են՝  ձեռքերը լվանում են Արցախից», – նշեց Մամիջանյանը:

«Այս պահին բանակցային սեղանին մի լուծում է, որը ենթադրում է Ադրբեջանի կազմում Արցախի հայտնվելը, որը չի ենթադրում Արցախի ինքնորոշման իրավունքի իրացնելը, որ ինքնորոշման իրավունքի մակարդակից բանակցային գործընթացն իջեցնում է արդեն ավելի վատ ձեւակերպման՝ էթնիկ փոքրաքմասնությունների իրավունքների, ազատությունների եւ անվտանգության ապահովման հարցերի»,- ընդգծեց ընդդիմադիր պատգամավորը։

«Պատիվ ունեմ» խմբակցության ղեկավարի դիտարկմամբ՝ ղարաբաղյան  հակամարտությունը երբևէ չի հանդիսացել տարածքային վեճ, ՀՀ որևէ ղեկավար երբևէ Արցախը չի ճանաչել Ադրբեջանի կազմում:

Մանրամասները՝ տեսանյութում։