Քիշնևի օդանավակայանում ձերբակալել են ռուսամետ կուսակցության փոխնախագահին

Մոլդովայում ռուսամետ «Շոր» կուսակցության փոխնախագահ Մարինա Տաուբերին երկուշաբթի օրը՝ մայիսի 1-ին, ձերբակալել են Քիշնևի օդանավակայանում, երբ նա փորձել է լքել երկիրը և թռչել Իսրայել, գրում է Korrespondent-ը։

«Այսօր առավոտյան Մարինա Տաուբերին ձերբակալել են Քիշնևի միջազգային օդանավակայանում՝ Ստամբուլով Թել Ավիվ մեկնելիս, կալանավորումը տեղի է ունեցել Հակակոռուպցիոն դատախազության որոշման հիման վրա՝ մեղադրյալի կողմից նրա նկատմամբ կիրառված խափանման միջոցի պայմանները խախտելու հիմքով»,- հայտնել են կառույցից։

Գերատեսչությունից պարզաբանել են, որ ապրիլի 28-ին դիմել են դատարան՝ Տաուբերի խափանման միջոցը՝ «դատական հսկողության ներքո պայմանական ազատ արձակելը» «նախնական կալանքով » փոխարինելու պահանջով։

Դատախազության տվյալներով՝ «Շոր» կուսակցության փոխնախագահին ձերբակալելու որոշումը պայմանավորված է «էական ռիսկով», որ նա կթաքնվի իրավապահ մարմիններից։ Ձերբակալությունից անմիջապես առաջ Տաուբերը ֆեյսբուքյան իր էջում տեսաուղերձ է հրապարակել և հայտնել, որ ծրագրել էր մեկնել արտասահման՝ որոշ բժշկական հետազոտություններ անցնելու համար։

Փետրվարին Մարինա Տաուբերը, որն անցնում է «Շոր» քաղաքական կուսակցության անօրինական ֆինանսավորման գործով, ազատվել էր խափանման միջոցից, քանի որ Քիշնևի վերաքննիչ դատարանի քրեական կոլեգիան բավարարել էր փաստաբանների բողոքը ի շահ մեղադրյալի:
Նշենք, որ Տաուբերն անցնում է երկու քրեական գործով՝ «Շոր» կուսակցության ապօրինի ֆինանսավորման և խարդախության։ Հետաքննությունը կարծում է, որ կուսակցության 2022 թվականի առաջին կիսամյակի ծախսերը զգալիորեն գերազանցել են պաշտոնական հայտարարագրում նշված գումարը։