ԱՄՆ-ում կարող է դեֆոլտ լինել, եթե Կոնգրեսը չբարձրացնի պետական պարտքի վերին շեմը

ԱՄՆ ֆինանսների նախարար Ջանեթ Յելենը նախազգուշացրել է, որ եթե Կոնգրեսը չբարձրացնի օրենքով թույլատրելի պետական պարտքի վերին շեմը կամ չկանգնեցնի դրա ազդեցությունը, մինչ հունիսի 1-ը երկրի բյուջետային միջոցները կարող են սպառվել։ Դա կարող է հանգեցնել դեֆոլտի, որն ԱՄՆ պատմության մեջ դեռևս չի եղել։ Առանց պարտքի վերին շեմի բարձրացման ԱՄՆ իշխանությունները չեն կարողանա նոր փոխառություններ ստանալ, գրում է BBC-ի ռուսական ծառայությունը։ Երկուշաբթի Յելենը կոչ է արել Կոնգրեսին ինչքան հնարավոր է արագ բարձրացնել սահմանը, որն այժմ սահմանված է 31,4 տրիլիոն դոլար։

Նույն օրը ԱՄՆ Կոնգրեսի բյուջետային գրասենյակը նախազգուշացրել է զգալի ռիսկի մասին, որ մինչ հունիսի սկիզբը գանձապետարանի միջոցները կսպառվեն:
«Միևնույն ժամանակ, անհասկանալի է մնում, թե կոնկրետ երբ միջոցները կարող են սպառվել, քանի որ դժվար է գուշակել ծախսերի չափը, ինչպես նաև հարկային եկամուտների ժամկետներն ու չափերը առաջիկա շաբաթների ընթացքում», – ասվում է զեկույցում:

Մինչև եռամսյակի վերջը, այսինքն՝ մինչև հունիս, Ֆինանսների նախարարությունը նախատեսում է նախկին ծրագրերի համեմատ ավելացնել իր փոխառությունները մոտ 449 մլրդ դոլարով, այդպիսով դրանց չափը կկազմի մոտ 726 միլիարդ դոլար։ Պետական պարտքի վերին շեմի բարձրացումը սովորական ընթացակարգ է ԱՄՆ-ի համար. 1960 թվականից ի վեր դա տեղի է ունեցել 78 անգամ: Այժմ, սակայն, հանրապետականները, որոնք վերահսկում են Ներկայացուցիչների պալատը, դեմ են դեմոկրատ նախագահ Ջո Բայդենի հայտարարած ծախսերի ծրագրին։