15.11.2024 | 23:30
Թուրքիայի նախագահականը հերքում է Էրդողանի և նրա դաշնակից Բահչելիի միջև տարաձայնությունները քրդական հարցի շուրջ
Իրավական առումով սա նոնսենս է․ ԱԱԾ-ն ու ՊԵԿ-ը պետք է բացահայտեն․ Ատոմ Մարգարյան
Հասարակություն
28.06.2018 | 15:48
Բարձրաստիճան պաշտոնատար անձանց էթիկայի հանձնաժողովը հրապարակել է ուսումնասիրություն, ըստ որի, 2014-2017 թթ. ժամանակահատվածում բարձրաստիճան պաշտոնատար անձանց և նրանց հետ փոխկապակցված անձանց մասնակցությամբ 91 առևտրային կազմակերպություն ճանաչվել է հայտարարված գնումների մրցույթի հաղթող և նրանց հետ կնքվել է 709 պայմանագիր, որից 99-ում առկա է շահերի բախում։
ՀՊՏՀ «Ինովացիոն և ինստիտուցիոնալ հետազոտություններ» լաբորատորիայի ղեկավար Ատոմ Մարգարյանը Factor․am-ի հետ զրույցում, խոսելով այս ուսումնասիրության և կատարված բացահայտումների մասին, նշեց, որ տեղի ունեցած գործարքը նման է կոռուպցիոն սխեմայի, իսկ այն, որ նման արտառոց բաներ կարող էին տեղի ունենալ, ենթադրելի էր, քանի որ որևէ իրավական, քաղաքական և բարոյական արգելակ գնումների ոլորտում չի գործել։
«Մենք տեսնում ենք, փաստորեն, որ մարդիկ, խմբեր հենց այդպիսի սխեմաներ են օգտագործել և, ես չեմ բացառում, որ կարող են արտառոց դեպքեր էլ լինել, և իրավական առումով սա նոնսենս է»,- ասաց տնտեսագետը։
Հարցին՝ արդյոք պաշտոնյաների կողմից այս գործելաոճը և կնքված 700-ից ավելի պայմանագրերը պետք է դառնան Ազգային անվտանգության և պետեկամուտների կոմիտեի ուսումնասիրության առարկա, Ատոմ Մարգարյանը պատասխանեց․ «Ե՛վ ԱԱԾ-ն, և՛ ՊԵԿ-ը, և՛ անկախ աուդիտորական մասնագիտական կառույցները պետք է ներգրավվեն այս գործում, իսկ եթե սկսվեն քննչական գործողություններ, պետք է գործին ներգրավվել նաև այնպիսի փորձագիտական կառույցների, որոնք կոմպետենտ են միջազգային չափանիշների առումով։ Ի վերջո, գնումների համակարգը կոռուպցիոն ամենաբազմակետրոն համակարգերից մեկն է եղել և շերտ-առ շերտ այն պետք է մաքրել»։
Նշենք, որ, ըստ Բարձրաստիճան պաշտոնատար անձանց էթիկայի հանձնաժողովի հրապարակած ցուցակի, իրենք իրենց հետ պայմանագրեր են կնքել այնպիսի ընկերություններ ինչպիսիք են օրինակ՝ «Ավշարի գինու գործարանը», որը պատկանում է ՀՀԿ-ական պատգամավոր Արայիկ Գրիգորյանին (Ավշարի Արայիկ), ՀՀԿ-ական մեկ այլ պատգամավոր Խոսրով Հարությունյանի եղբորը պատկանող «Արամյանց»բժշկական կենտրոնը, «Ծառուկյան» խմբակցության ղեկավար Գագիկ Ծառուկյանին պատկանող «Երևանի Արարատ կոնյակի-գինու-օղու գործարանը», ՀՀԿ-ական պատգամավոր Արտակ Ալեքսանյանին պատկանող «ՍԱՍ ԳՐՈՒՊ»-ը, «Արաբկիր» բժշկական համալիր-երեխաների և դեռահասների առողջության ինստիտուտ» ՍՊԸ-ն, որը պատկանում է ԱԺ նախագահ Արա Բաբլոյանի ընտանիքին։
Այս ընկերությունները միակը չեն, հրապարակված ցանկում առկա են այլ ընկերություններ, ևս որոնք կապվում են Ազգային ժողովի պատգամավորներից ոմանց հետ։
Աղավնի Սուքիասյան
