Ուզբեկստանում Սահմանադրության փոփոխությունների հանրաքվե է անցկացվել․ ԵԱՀԿ դիտորդները քննադատել են այն

Ուզբեկստանում ապրիլի 30-ին քվեարկել են սահմանադրության փոփոխությունների համար, որոնք երկրի քաղաքացիներին խոստանում են ավելի շատ սոցիալական պաշտպանվածություն՝ երկրի նախագահ Շավքաթ Միրզիյոևի լիազորությունների ժամկետը զրոյացնելու դիմաց, ինչը կարող է թույլ տալ նրան առաջադրվել ևս երկու անգամ՝ յոթ տարի ժամկետով, փոխանցում է VOA-ն։

Բարեփոխումը նաև ավելացնում է նախագահական ժամկետը՝ այն 5-ից դարձնելով 7 տարի, ինչը կարող է 65-ամյա Միրզիյոևին թույլ տալ մինչև 2040 թվականը մնալ 35 միլիոնանոց երկրի ղեկավար։ Նրա պաշտոնավարման ներկայիս ժամկետն ավարտվում է 2026 թվականին։

Միևնույն ժամանակ, փոփոխությունների փաթեթն Ուզբեկստանը հռչակում է «սոցիալական պետություն»՝ ավելացված սոցիալական ապահովության պարտավորություններով և թույլատրում է ոչ գյուղատնտեսական հողերի սեփականությունը։ Այն նաև առաջարկում է մահապատժի վերացում և քաղաքացիների համար ավելի լայն իրավական պաշտպանության սահմանում, օրինակ՝ ձերբակալության ժամանակ մարդու իրավունքների հարգում, պաշտպանություն ապօրինի և անժամկետ ազատազրկումից։

Հանրաքվեին մասնակցությունը գերազանցել է 80%-ը, քվեարկության նախնական արդյունքները կհրապարակվեն այսօր՝ մայիսի 1-ին։

Մինչ այդ, ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) դիտորդական առաքելությունը հայտարարել է, որ Ուզբեկստանի Սահմանադրության փոփոխությունների հանրաքվեն անցկացվել է այնպիսի պայմաններում, որոնք չեն բավարարում քաղաքական բազմակարծության և մրցունակության պահանջներին, հայտարարել է առաքելության ղեկավար Ալբերտ Ջոնսոնը։

Նա նշել է, որ հանրաքվեն ներկայացվել է որպես ավելի լայն բարեփոխումների շարունակություն, և որ խորհրդակցությունների գործընթացը, ընդհանուր առմամբ, ներառական է եղել, սակայն բացակայել է որոշ զգայուն հարցերի շուրջ բաց բանավեճը:

Տաթև Ֆռանգյան