ՀԱՀ իշխանությունները Պուտինին խնդրել են չժամանել ԲՐԻԿՍ-ի համաժողովին՝ նրա ձերբակալման օրդերի պատճառով

Հարավաֆրիկյան Հանրապետության իշխանությունները խնդրել են ՌԴ նախագահ Վլադիմիր Պուտինին ԲՐԻԿՍ-ի գագաթնաժողովի համար երկիր չժամանել, այլ մասնակցել Zoom-ով։ Այս մասին գրում է ՌԲԿ Ուկրաինան՝ վկայակոչելով Sunday Times-ին։

Այս որոշումը կայացվել է այն բանից հետո, երբ Պրետորիան իրավաբանական խորհրդատվության է դիմել Պուտինին ձերբակալելու իր պարտավորությունների վերաբերյալ։ Վլադիմիր Պուտինին հրավիրել են մասնակցելու հինգ զարգացող տնտեսությունների՝ Բրազիլիայի, Ռուսաստանի, Հնդկաստանի, Չինաստանի և հյուրընկալող երկրի՝ Հարավաֆրիկյան Հանրապետության ղեկավարների գագաթնաժողովին։

ՀԱՀ-ը հրաժարվել է աջակցել ՌԴ-ի դեմ պատժամիջոցներին կամ դատապարտել նրա ագրեսիան Ուկրաինայի դեմ։ Սակայն Միջազգային քրեական դատարանի կողմից Պուտինին ձերբակալելու օրդեր տալն անհարմար դրության մեջ է դրել Հարավաֆրիկյան Հանրապետության իշխող կուսակցությանը։

ՀԱՀ-ն  այն երկրների թվում է, որոնք ստորագրել են Հռոմի ստատուտը, ինչը պարտավորեցնում է նրան կատարել ՄՔԴ-ի որոշումները։

«Մենք Պուտինին չկալանավորելու տարբերակ չունենք: Եթե նա գա այստեղ, ստիպված կլինենք նրան կալանավորել»,-  լրատվամիջոցին ասել է Հարավաֆրիկյան Հանրապետության կառավարության ներկայացուցիչը:

Անցյալ շաբաթ նախագահ Սիրիլ Ռամապոսան հատուկ կառավարական կոմիտե է ձևավորել՝ երկրի փոխնախագահի գլխավորությամբ, որն ուսումնասիրում է կառավարության գործողությունների տարբերակները՝ Պուտինի ձերբակալության օրդերի վերաբերյալ։ Լրատվամիջոցի աղբյուրի խոսքով՝ կոմիտեն չի կարողանում այլ տարբերակներ գտնել, քան գագաթնաժողովին  Պուտինի մասնակցությունը Մոսկվայից տեսակապի միջոցով։

Բարձրաստիճան պաշտոնյաները Sunday Times-ին հաստատել են, որ այդ հարցով բանակցություններ են տարվում Մոսկվայի հետ: Ապրիլին ՀԱՀ իշխանությունները հայտարարել էին, որ մտադիր են դուրս գալ Հռոմի ստատուտից, սակայն հետո հերքեցին՝ նշելով, որ երկիրը մնում է Միջազգային քրեական դատարանի կողմ և շարունակելու է հետևողականորեն կիրառել միջազգային իրավունքը:

Էմմա Չոբանյան