Կենդանիների անկումը բնականոն պրոցես է. անգղերի անկման պատճառը հայտնի չէ. այգու տնօրենի պաշտոնակատար․ ՏԵՍԱՆՅՈՒԹ

Մեկնարկել է Երևանի կենդանաբանական այգու տարեշրջանի բացման արարողությունը։

Կենդանիների անկումը բնականոն պրոցես է։ Կենդանիների անկման որոշակի տոկոս կա, որը սպասելի է․ միջառանձնյակային պայքարը բացառել չենք կարող, կենդանիները վնասվածքներից էլ կարող են մահանալ։ Մեր կենդանաբանական այգում էլ անկումներ լինում են, անցած տարվա ընթացքում այն հասել է մոտ 7 տոկոսի․ այս տեսակետից նորմալ գործընթաց է։ Այս մասին այսօր լրագրողների հետ զրույցում նշեց Երևանի Կենդանաբանական այգու տնօրեն Աշոտ Ասլանյանը։

Անդրադառնալով անցած տարի 4-6 անգղերի անկման մեծ աղմուկ բարձրացրած դեպքերին, նրանց ենթադրյալ թունավորմանը, Ասլանյանը նշեց, որ այդ առնչությամբ քրեական գործեր են հարուցվել, թունավորման փաստը չի հաստատվել։

«Անգղերի անկումը տեղի է ունեցել անցած տարվա սկզբին, ես դրանից հետո եմ աշխատանքի ընդունվել, մասամբ նաև կենդանիների անկումը եղավ տնօրինության փոփոխության պատճառ։

Անգղերին թունավորելը շատ դժվար է, քանի որ նրանք լեշակեր են, բնության սանիտարներ են, ունեն հզոր մարսողական և իմունային համակարգ։

Կատարվել են փորձագիտական հետազոտություններ, արդյունքում անգղերի թունավորման փաստերը չեն հաստատվել»,- նշեց Կենդանաբանական այգու տնօրենը՝ հավելելով, որ անգղերի անկման ստույգ պատճառը հայտնի չէ, բայց կա վարկած, որ նրանց անկման պատճառը եղել է հյուծվածությունը, քանի որ նրանց քաշը նորմայից շատ ցածր է եղել։

Մանրամասները՝ տեսանյութում։