Էրդողանն ու Քըլըչդարօղլուն բազմահազարանոց հանրահավաքներ են անցկացրել

Թուրքիայում ընտրություններից երկու շաբաթ առաջ ընդդիմությունն ու իշխանությունը իրենց հարյուր հազարավոր կողմնակիցների փողոց են դուրս բերել, գրում է Euronews-ը։

Մասնավորապես, նախօրեին Անկարայում անցկացվել է գործող նախագահ, իշխող «Արդարություն և զարգացում» կուսակցության (ԱԶԿ) առաջնորդ Ռեջեփ Թայիփ Էրդողանի նախընտրական հանրահավաքը, որը երկիրը ղեկավարում է 2003 թվականից։ Իր ելույթում նա խոստացել է «Աստծո օգնությամբ ոչնչացնել ընդդիմությանը»։

Մի շարք դիտորդներ նշում են, որ իշխանության և իշխող ԱԶԿ-ի ներկայացուցիչները լարվածության մթնոլորտ են ստեղծում և փորձում են «քրեականացնել» իրենց հակառակորդներին։

Իսկ ահա ընդդիմության միասնական թեկնածու, Աթաթուրքի հիմնադրած Ժողովրդահանրապետական կուսակցության առաջնորդ Քեմալ Քըլըչդարօղլուն իր ընտրողներին խոստացել է «վերադարձնել Թուրքիան դեպի լույսը» և «վերականգնել թուրքական ժողովրդավարությունը»։ Հիշեցնենք, որ նախագահական ընտրություններում նա առաջադրվել է ընդդիմադիր վեց կուսակցությունների դաշինքի կողմից։

Քըլըչդարօղլուի հանրահավաքը տեղի է ունեցել Իզմիրում՝ Էգեյան ծովի ափին, որը Ստամբուլի հետ միասին անվանում են ընդդիմության հենակետ։ Նախորդ ընտրություններում Էրդողանը երկրի մեծությամբ երրորդ քաղաքում հավաքել էր մեկ երրորդից էլ պակաս ձայներ։

Ի դեպ, տեղական լրատվամիջոցները հայտնում են, որ պետական և իշխանամետ լրատվական գործակալությունները չեն լուսաբանել ընդդիմության հանրահավաքը՝ ցուցադրելով միայն Էրդողանի ելույթն Անկարայում։

Էմմա Չոբանյան