13.04.2026 | 12:34
Զատկի հրադադարն ավարտվեց. ռուսական և ուկրաինական կողմերը հայտարարում են խախտումների մասին
Ռազմական ղեկավարության հաճախակի փոփոխությունները խաթարել են ռուսական բանակի մարտունակությունը․ ISW
Քաղաքականություն
01.05.2023 | 13:51
Պատերազմի ուսումնասիրության ամերիկյան ինստիտուտը (ISW) հատուկ զեկույց է հրապարակել Ուկրաինայում ռուսական ուժերի ղեկավարների կադրային փոփոխությունների մասին։ Զեկույցի հիմնական եզրահանգումն այն է, որ մշտապես նոր հրամանատարների նշանակումը և տարբեր խմբավորումների միջև վեճերը ՌԴ ՊՆ-ում խաթարում են ռուսական բանակի՝ մարտադաշտում արդյունավետ գործելու կարողությունը, գրում է BBC-ի ռուսական ծառայությունը։
Զեկույցում մանրամասն նշվում են ռազմական նշանակումները, որոնք արել են ՌԴ ՊՆ-ն և Կրեմլը Ուկրաինա լայնամասշտաբ ներխուժումից ի վեր։ Ասվում է, որ նախագահ Վլադիմիր Պուտինն ի սկզբանե չի ցանկացել նշանակել Ուկրաինայում ռուսական զորքերի մեկ հրամանատար, այնուհետ այդ պաշտոնում նշանակել է գեներալ Ալեքսանդր Դվորնիկովին, իսկ մի քանի շաբաթ անց նրան ազատել է, ինչպես ասում են՝ մինչև 2022 թվականի մայիսի 9-ը Դոնբասը գրավել չկարողանալու համար։
Հետո Ռուսաստանի ղեկավարությունը բազմիցս փոխել է տարբեր մակարդակների ռազմական ղեկավարներին։
«Նախագահ Վլադիմիր Պուտինի՝ առանց հստակ և դոկտրինալ հրամանատարական կառույցի Ուկրաինա ներխուժելու որոշումը և հրամանատար նշանակելու նրա դժկամությունը երկարաժամկետ հետևանքներ ունեցան Ուկրաինայում ռուսական հրամանատարական կառույցի վրա։ Հրամկազմի փոփոխության՝ Պուտինի պարբերական որոշումները ռուսական բանակը դարձնում են ավելի մասնատված և անկազմակերպ հրամանատարական կառույցներ, որը ոչնչացնում է Ուկրաինայում կազմակերպված արշավ իրականացնելու՝ նրա կարողությունը»,- ասվում է զեկույցում։
Ինստիտուտի փորձագետները նշում են, որ մասնատումը եզակի չէ ռուսական բանակի համար, սակայն նրա զարգացումը ՌԴ զինվորականների շրջանում անսովոր ազդեցություն է ունենում որոշումների կայացման գործընթացի վրա։
Էմմա Չոբանյան
