Կարևոր է օբյեկտիվ ընթացակարգ ենթադրող պրոցեսների վերաբերյալ կանխակալ դիրքորոշում չարտահայտելը. ՄԻՊ-ը՝ իրավապահների աղմկահարույց բացահայտումների մասին․ ՏԵՍԱՆՅՈՒԹ

Կոռուպցիայի դեմ պայքարը և պատասխանատվության խիստ միջոցների կիրառումն, անշուշտ, կարևոր են, սակայն պետք է պահպանվեն իրավական ընթացակարգերը: Այս մասին այսօր Մարդու իրավունքների պաշտպանի տարեկան հաղորդման և զեկույցի վերաբերյալ լրագրողների հետ աշխատանքային հանդիպման ժամանակ հայտարարեց օմբուդսմեն Արման Թաթոյանը:

Factor.am-ը օմբուդսմենին խնդրեց հեղափոխությունից հետո իրականացվող կոռուպցիոն բացահայտումների ֆոնին անդրադառնալ իրավապահների գործողություններին:

Հիշեցնենք՝ վերջին օրերին աղմկահարույց բացահայտումների հետևանքով բերման են ենթարկվել նախկին իշխանության հետ սերտ առնչություն ունեցող տարբեր պաշտոնյաներ, որոնցից ամենաաղմկահարույցը, թերևս,  ԱԺ ՀՀԿ խմբակցության պատգամավոր Մանվել Գրիգորյանին առնչվող բացահայտումներն էին:

Գրիգորյանի կալանավորումից հետո նրա փաստաբաններն ահազանգել էին իրենց պաշտպանյալի նկատմամբ իրականացվող խոշտանգումների մասին: Մարդու իրավունքների պաշտպանը մինչդեռ նշեց Գրիգորյանի ձերբակալման հենց առաջին օրն այցելել է նրան, ապա պնդեց՝ գեներալը որևէ դժգոհություն չի հայտնել, միայն նշել է, որ իրեն որոշ դեղեր են անհրաժեշտ: Դրանք, ըստ օմբուդսմենի, Մանվել Գրիգորյանը ստացել է:

Ինչ վերաբերում է իրավապահների գործողություններին, ապա Թաթոյանն ընդգծեց՝ կոռուպցիան մարդու իրավունքներին ուղղված առաջին մարտահրավերներից  է:

Մարդու իրաավունքների պաշտպանը նաև տեղեկացրեց, որ մինչ հեղափոխությունը՝ ապրիլյան իրադարձությունների ընթացքում արձանագրվել են դեպքեր, երբ մարդիկ ենթարկվել են բռնության ոստիկանության ծառայողների կողմից, այդ թվում՝ անչափահասներ:

Անդրադառնալով արդեն տարեկան զեկույցին՝ Մարդու իրավունքների պաշտպանը շեշտեց, որ դրանում առանձնահատուկ տեղ են գրավում լրագրողների գործունեությանն առնչվող խնդիրները, ապա ներկայացրեց այն ոլորտները, որոնց անդրադարձել են: Դրանք հիմնականում առնչվում էին աշխատանքային և սոցիալական իրավունքներին, գործարարության ոլորտում իրավունքների պաշտպանությանը, մարդու իրավունքները Զինված ուժերում, կալանքը որպես խափանման միջոց կիրառելու հարցին է անդրադարձ կատարվել և այլն:

Նշենք նաև, որ տարեկան զեկույցում, ինչպես Թաթոյանը տեղեկացրեց, տեղ են գտել հանրության ուշադրության կենտրոնում գտնվող մի շարք գործեր:

Մանրամասները՝ տեսանյութում: