28.06.2026 | 05:30
ԱԱ-2026. Պորտուգալիան չհաղթեց Կոլումբիային ու փլեյ-օֆֆ դուրս եկավ երկրորդ տեղով. ՏԵՍԱՆՅՈՒԹ
Գերմանական կողմը հայտնել է, որ սիրիահայերի տնտեսական ինտեգրման ծրագիրը կունենա շարունակություն տարածաշրջանային մակարդակով
Տնտեսություն
27.06.2018 | 18:26
ՀՀ տնտեսական զարգացման և ներդրումների նախարար Արծվիկ Մինասյանը հանդիպում է ունեցել Հայաստանի Հանրապետությունում Գերմանիայի Դաշնային Հանրապետության փոխդեսպան Քլաուս Վենդելբերգերի և GIZ-Հայաստանի ներկայացուցիչների հետ՝ GIZ Armenia-ի տարածաշրջանային տնօրեն Անն Քեմփայի գլխավորությամբ. տեղեկացնում է նախարարության լրատվական ծառայությունը:
Նախարարը ողջունել է հյուրերին, շնորհակալություն հայտնել համատեղ շարունակական աշխատանքի և Հայստանին Գերմանիայի կառավարության աջակցության համար։ Իրենց հերթին հյուրերը շնորհավորել են նախարարին պաշտոնում նշանակման կապակցությամբ, պատրաստակամություն են հայտնել շարունակելու իրականացվող ծրագրերը, նաև խոսել են նոր աշխատանքների նախանշման մասին։
Հանդիպմանն անդրադարձ է եղել «Աջակցություն ՓՄՁ զարգացմանը Հայաստանում» ծրագրին, «Սիրիացի փախստականների տնտեսական ինտեգրումը Հայաստանում» ծրագրի շրջանակներում սիրիահայերի տնտեսական ինտեգրման և նրանց բիզնեսի կայացմանն ուղղված աշխատանքներին:
Վերջինիս հետ կապված գերմանական կողմը հայտնել է, որ ծրագիրը կունենա շարունակություն տարածաշրջանային մակարդակով։ Նախարարին է ներկայացվել գերատեչության հետ բոլոր ծրագրերով իրականացված աշխատանքը։ Խոսվել է ձեռներեցության կարողությունների խթանման և զարգացման գործընթացներին աջակցության մասին, կարևորվել է պետություն-մասնավոր հատված երկխոսությունը։ Գերմանացի մասնագետները նշել են, որ աջակցություն են ցուցաբերելու պետական և մասնավոր հատվածին ԵՄ «Հորիզոն 2020» ծրագրին մասնակցության նպատակով՝ խթանելով նորարարության և ձեռներեցության ոլորտի զարգացումը։ Քննարկվել են նաև զբոսաշրջության ոլորտի զարգացման առաջնահերթությունները։
Հանդիպման ավարտին կողմերը ևս մեկ անգամ հավաստել են նոր թափով աշխատանքները շարունակելու պատրաստակամությունը։
