ՔՊ-ական պատգամավորը՝ Թագուհի Թովմասյանին հանձնաժողովի նախագահի պաշտոնից զրկելու նախաձեռնության մասին․ ՏԵՍԱՆՅՈՒԹ

Ինչպես հայտնի է, ՔՊ խմբակցության պատգամավոր Հովիկ Աղազարյանը ԱԺ մարդու իրավունքների պաշտպանության և հանրային հարցերի հանձնաժողովի նախագահի պաշտոնից Թագուհի Թովմասյանին պաշտոնանկ անելու գործընթաց է նախաձեռնել ու ԱԺ-ում ստորագրահավաք է իրականացնում:

Լրագրողների հետ զրույցում ՔՊ խմբակցության պատգամավոր Արմեն Խաչատրյանն ասաց, որ դեռ չի ծանոթացել հիմքերին, կծանոթանա, կորոշի՝ իրավաչա՞փ է, թե՞ ոչ. «Ովքեր նախաձեռնել են, գալու են ներկայացնեն իրենց հիմնավորումները: Եթե ես կարծեի, որ հիմքեր կան, ես կնախաձեռնեի, բայց եթե իրենք ներքին համոզմունք ու հիմքեր ունեն, որ պետք է վայր դնի պաշտոնը, մենք այդ հիմքերը կնայենք»:

Խաչատրյանի դիտարկմամբ՝ ՄԻՊ թեկնածու Էդգար Ղազարյանը «victim» վարքագիծ է ունեցել՝ իրեն տուժողի տեղ է դրել, բայց պրովոկացիա է իրականացրել, սադրել է:

«Եթե հիմա փորձում ենք հետ դառնալ, թե 92 թվին ինչ է եղել, 88-ին ինչ է եղել, բերենք ասենք՝ ուրեմն այդ նույն բանը հիմա կարող ենք անել, ամեն իրավիճակ ունի իր օբյեկտիվ պայմաններն ու պատճառները: Դուք մի համեմատեք, էն վախտ հեղափոխություն է եղել:
Բայց սահմանադրական նորմեր կան, որոնք պետք է պահպանվեն եւ առաջինը այս դահլիճում պետք է պահպանվեն: Եթե մարդը ամբիոնում ասում է՝ ես թույլ չեմ տալիս ուրիշ ոչ մեկը ելույթ ունենա այս ամբիոնից, դրանով խախտում է բոլորի սահմանադրական իրավունքները»,- նշեց Խաչատրյանը՝ անդրադառնալով հարցին, թե երեկ ԱԺ նախագահի գործողությունները, երբ բռնի ուժով հրամայեց հեռացնել քաղաքական ակցիա անող Թագուհի Թովմասյանին և ընդդիմադիր այլ պատգամավորների, ինչքանո՞վ է իրավաչափ գնահատում՝ հաշվի առնելով, որ նախկինում ևս նման ակցիաներ են իրականացվել ԱԺ-ում։

Մանրամասները՝ տեսանյութում։