Զերծ մնալ վիրավորանքներից․ Ալեն Սիմոնյանը ընդդիմադիրների ձայնի իրավունքը վերականգնեց․ ՏԵՍԱՆՅՈՒԹ

Ազգային ժողովի՝ երեքշաբթի մեկնարկած արտահերթ նիստը շարունակվում է։ «Հայաստան» խմբակցության ղեկավար Սեյրան Օհանյանը վարման կարգով հանդես եկավ:

«Երեկվա միջադեպի պատճառով «Հայաստան» խմբակցության պատգամավորների նախապատրաստած ելույթներն ընդհատվեցին, առաջարկում ենք վերականգնել, որ  պատգամավորները հնարավորություն ունենան խոսելու», – նշեց նա:

ԱԺ նախագահ Ալեն Սիմոնյանը նշեց, որ առաջարկն ընդունելի է․ որոշվեց թույլատրել պատգամավորներին ելույթներ ունենալ:

Սիմոնյանը հորդորեց զերծ մնալ վիրավորանքներից ու հնարավոր սադրանքներից:

«Ես կարծում եմ՝ մեր հայրենակիցները, ովքեր ձեզ ընտրել են, մեզ ընտրել են, չպետք է ականատես լինեն, թե ինչպես են ընդդիմության պատգամավորները գալիս քողարկված վիրավորանքներ ասում, սադրում ու հետագայում զոհի կարգավիճակով ներկայանում մամուլի առաջ: Եթե մենք կարողանում ենք ապահովել բովանդակային քննարկում, ես կարծում եմ, որ կարելի է վերականգնել», – նշեց ԱԺ նախագահը:

«Քաղաքացիական պայմանագիր» խմբակցության ղեկավար Հայկ Կոնջորյանը նշեց՝ կողմ է, որ վերականգնվի ընդդիմադիր պատգամավորների ելույթների հնարավորությունը: «Առաջարկում եմ,  որ մեր խմբակցության պատգամավորները, ովքեր երեկ հանել էին իրենց ելույթները, իրենց ելույթների հնարավորությունը ևս վերականգնվի», – նշեց պատգամավորը:

«Հայաստան» խմբակցության քարտուղար Արծվիկ Մինասյանը նշեց, թե իրենց խմբակցությունը երեկ ունեցել է միայն քաղաքական ելույթներ, ավելին՝ հստակ գնահատականներ են հնչեցրել: «Մեր նպատակը խաթարելը չէ, հակառակը՝ օբյեկտիվ գնահատական տալն է: Երեկ այս ամբիոնից անպարկեշտ գնահատականներ են հնչել ՀՅԴ-ի հասցեին, այս ամեն ինչին պատրաստվում ենք հակադարձել», – նշեց պատգամավորը:

ԱԺ նախագահը հայտարարեց, որ ԱԺ ամբիոնից թե՛ իշխանական, թե՛ ընդդիմադիր պատգամավորները չպետք է անպարկեշտ հայտարարություններ անեն։

Մանրամասները՝ տեսանյութում։