16.01.2026 | 20:00
Հայաստանը 100-ից 26 միավոր է ստացել․ SIGMA-ն գնահատել է հանրային կառավարման ոլորտը․ ՏԵՍԱՆՅՈՒԹ
Ադրբեջանը Ռուսաստանին բողոքի նոտա է հղել
Քաղաքականություն
21.04.2023 | 11:43
Մոսկվայում Ադրբեջանի դեսպանատունը բողոքի նոտա է հղել ՌԴ ԱԳՆ՝ «Ռուսարմինֆո» լրատվական գործակալության եթերում ՌԴ Պետդումայի տեղեկատվական քաղաքականության, տեղեկատվական տեխնոլոգիաների և հաղորդակցության կոմիտեի փոխնախագահ Օլեգ Մատվեյչևի հայտարարությունների կապակցությամբ։
Բաքվին դուր չեն եկել իշխող «Եդինայա Ռոսիա» կուսակցության պատգամավորի հայտարարությունները Ադրբեջանի և Թուրքիայի հասցեին, որոնք, ըստ ադրբեջանական կողմի, ուղղված են տարածաշրջանում իրավիճակի ապակայունացմանը։
«Այդ կապակցությամբ ադրբեջանական կողմի համոզմունքն է արտահայտվել, որ ՌԴ իշխող կուսակցության ներկայացուցչի նման հայտարարությունները ստվեր են գցում Ռուսաստանի միջնորդական գործունեության վրա, որն աջակցում է Ադրբեջանի տարածքային ամբողջականությանը և ջանքեր է գործադրում հայ-ադրբեջանական հարաբերությունների կարգավորման համար։ Մատվեյչևը չի կարող անտեղյակ լինել 2022 թվականի փետրվարին երկու երկրների միջև դաշնակցային համագործակցության մասին հռչակագրի մասին, և որ նման հայտարարությունները խախտում են դրա դրույթները։ Իշխող կուսակցության պատգամավորն իր հայտարարություններում պետք է պատասխանատվություն դրսևորի և հավատարիմ մնա Ռուսաստանի Դաշնության պաշտոնական դիրքորոշմանը», – ասվում է դեսպանատան հայտարարության մեջ։
Հավելենք, որ ռուս պատգամավորն իր հարցազրույցում ասել էր, որ Թուրքիային ու Ադրբեջանին դուր չեն գալիս Հայաստանի, ՌԴ-ի ու Ադրբեջանի ղեկավարների 2020թ-ին ձեռք բերված պայմանավորվածությունները։ Մատվեյչևի խոսքով՝ Բաքուն ու Անկարան ձգտում են Ղարաբաղյան հակամարտության թեժ փուլը վերսկսել և փորձում են հայկական կողմին սադրել պատասխան գործողությունների։
Էմմա Չոբանյան
