Փաշինյանն արձագանքեց Ալիևին. նոր էսկալացիայի վտանգը և իրավիճակը Տեղում․ ՏԵՍԱՆՅՈՒԹ

Սյունիքի մարզի Տեղ համայնքում 5 կիլոմետրանոց հատվածը հայկական կողմը համարել է խնդրահարույց, որից 1․4 կլիոմետրն արդեն ճշգրտված է։ Այսօր խորհրդարանում լրագրողների հետ ճեպազրույցում հայտարարեց վարչապետ Նիկոլ Փաշինյանը՝ հույս հայտնելով, որ մնացած 3․6 կիլոմետրը ևս կճշգրտվի։ Չնայած Փաշինյանը այսօր խոսում էր ԱԱԾ սահմանապահ զորքերի աշխատանքի արդյունավետությունից՝   ապրիլի 12-ին հայտնի դարձավ, որ պաշտոնից ազատվել է ավելի քան երկու տարի սահմանապահ զորքերի հրամանատարի պաշտոնը զբաղեցրած Արամ Մարալչյանը։ Նրա պաշտոնանկությանը նախորդել էին Տեղ գյուղի հատվածում տեղի ունեցած բախումները հայ և ադրբեջանցի զինծառայողների միջև, որի հետևանքով հայկական կողմը ունեցավ 4 զոհ, 6 վիրավոր։ Թեև Արամ Մարալչյանի պաշտոնանկության առնչությամբ որևէ պարզաբանում չներկայացվեց, այդուհանդերձ ,Նիկոլ Փաշինյանը Տեղ գյուղի դեպքերի հետ կապված հայտարարեց, թե տրվել են կոնկրետ հանձնարարականները, որոնք չեն կատարվել։ Թե ինչու Փաշինյանը մի կողմից բարձրաձայնում սահմանապահների արդյունավետ աշխատանքի մասին, մյուս կողմից ազատում նրանց հրամանատարին պարզ չէ։

Տեղ համայնքի դեպքերի վերաբերյալ ծառայողական քննություններ նշանակված են, այն էլ՝ մի քանի գերատեսչություններում , այդ թվում՝ Ազգային անվտանգության ծառայությունում Factor.am-ի հարցին ի պատասխան երեկ հաստատեց իշխանական պատգամավոր Արմեն Խաչատրչյանը։ Ի դեպ իշխանական պատգամավորը նաև հայտնեց՝ ադրբեջանը դիրքեր է կառուցում Հայաստանի տարածքում։

Տեղ գյուղի հատվածում ադրբեջանական ներխուժման մասին Ազգային անվտանգության ծառայությունը հայտնել էր մարտի 30-ին։ Ադրբեջանական կողմը 5 կետում, ըստ Ազգային անվտանգության ծառայության, 100-ից 300 մետր առաջ էր եկել։ Մինչ այժմ, ըստ համայնքի բնակիչների, ադրբեջանական կողմը շարունակում է մնալ այդ հատվածներում։ Այս ֆոնին երկու օր առաջ Ադրբեջանի նախագահը Հայաստանին ուղղված հերթական սպառնալիքները հնչեցրեց, անգամ պահանջեց, որ Փաշինյանը նախկինում արված «Արցախը Հայաստանն է և վերջ» հայտարարության փոխարեն այժմ ասի, «Ղարաբաղը Ադրբեջանն է և վերջ»։

Նիկոլ Փաշինյանն այսօր արձագանքեց Ալիևի այս հայտարարությանը՝ դրանք որակելով սադրիչ։ Եվ չնայած այս ամենին՝ Նիկոլ Փաշինյանը հերթական անգամ շեշտեց՝ հավատում է խաղաղության օրակարգին։ Խաղաղության պայմանագիր ստորագրելու հայկական կողմի հիմնական պայմանը, ըստ իշխանության, Հայաստանի տարածքային ամբողջականությունն է 29,800 քառակուսի կմ տարածքով, տևական խաղաղությամբ և անվտանգությամբ։

Խաղաղությունը ասելով չի լինում՝ Փաշինյանին հակադարձում է ընդդիմադիր «Հայաստան» խմբակցության պատգամավոր Գեղամ Մանուկյանը։  Մանուկյանը Փաշինյանի  հայտարարությունները  խնդրահարույց է համարում։

Հայաստանի և Ադրբեջանի միջև խաղաղության պայմանագիրը, Փաշինյանի գնահատմամբ, իրատեսական կդառնա, եթե երկու երկրները հստակ, առանց երկիմաստությունների և որոգայթների միմյանց տարածքային ամբողջականությունը ճանաչեն և պարտավորվեն այսօր և երբևէ միմյանց տարածքային պահանջներ չներկայացնել:

Մանրամասները՝ տեսանյութում։

Շողիկ Գալստյան