14.12.2025 | 17:25
Իրավիճակը ճանապարհներին՝ 17։15-ի դրությամբ
«Սարդ-մարդը» բարձրացել է Փարիզի երկնաքերը՝ իր աջակցությունը հայտնելով կենսաթոշակային բարեփոխումների դեմ բողոքողներին
Քաղաքականություն
19.04.2023 | 23:01
Ֆրանսիացի ալպինիստ Ալեն Ռոբերը՝ «Սարդ-մարդ» մականունով, բարձրացել է Փարիզի բիզնես թաղամասում գտնվող «La Defense» երկնաքերի վրա։ Այսպիսով նա աջակցել է Ֆրանսիայում կենսաթոշակային բարեփոխումների դեմ բողոքի ակցիաներին, հայտնում է Reuters-ը։
Ռոբերն այս վերելքն անվանել է «Ժողովուրդ» և հայտարարել, որ դա անում է ի նշան համերաշխության բոլոր նրանց հետ, ովքեր բողոքում են կենսաթոշակային տարիքը 62-ից 64 տարեկան բարձրացնելու դեմ: Սա երկրորդ անգամն է, որ Ալեն Ռոբերը բարձրանում է այս երկնաքերը՝ ի պաշտպանություն Ֆրանսիայի կառավարության կենսաթոշակային քաղաքականության դեմ ցուցարարների։
Ալեն Ռոբերը 60 տարեկան է։ 1994 թվականից նա մագլցում է բարձրահարկ շենքեր ամբողջ աշխարհում։ Նրա ռեկորդը Դուբայի «Բուրջ Խալիֆան» է՝ մոլորակի ամենաբարձր շենքը։
Հիշեցնենք, որ անցած ուրբաթ Ֆրանսիայի Սահմանադրական դատարանը հաստատեց կենսաթոշակային տարիքի մասին օրենքի առանցքային դրույթները, որոնց համաձայն՝ մինչև 2030 թվականը այն 62-ից կդառնա 64 տարեկան։ Այս կապակցությամբ Ֆրանսիայի արհմիությունները մայիսի 1-ին ծրագրել են պատմության մեջ ամենամեծ բողոքի ակցիան անցկացնել։
Տաթև Ֆռանգյան
