Թմրանյութի առևտրով զբաղվող միջազգային հանցագործները Թուրքիայի քաղաքացիություն են ստանում՝պատժից խուսափելու համար

Եվրոպական իշխանություններն ու իրավապահ մարմինները մտահոգված են, որ թմրանյութերի առևտրով զբաղվողներն օգտագործում են Թուրքիայի քաղաքացիության մասին օրենքները՝ այլ երկրներում հետապնդումներից խուսափելու համար, հաղորդում է ամերիկյան VICE World News-ը, որին վկայակոչում են թուրքական լրատվամիջոցները։

Նշվում է, որ իրավապահ մարմինների աշխատակիցներն անհանգստացած են Թուրքիայի ներդրողների քաղաքացիության սխեմայի շահագործմամբ այն հանցագործների կողմից, որոնք կապված են թմրանյութերի ապօրինի շրջանառության հետ: Վերջիններս շահարկում են Թուրքիայի դիրքորոշումը՝ մերժելով արտահանձնման խնդրանքը վերջերս քաղաքացիություն ստացած քաղաքացիների մասով։

Մասնավորապես, Ինտերպոլը և Շվեդիան  օրդեր են տվել ձերբակալելու իրաքցի քուրդ թմրավաճառ Ռավա Մաջիդին, որը հայտնի է «Քրդական աղվես» մականունով։ Նա  2020 թվականից բնակվում է Թուրքիայում՝ «Ոսկե անձնագիր» ծրագրով քաղաքացիություն ստանալու միջոցով, իսկ Անկարան հրաժարվում է ձերբակալել և արտահանձնել Մաջիդին։

Հոլանդացի մի  պաշտոնյա էլ ասել է, որ Յոս Լեյդեկերսը, որը երկրի ամենափրտվողների ցուցակում հայտնված թմրանյութերի վաճառողն է 200,000 եվրո պարգևով, թուրքական անձնագիր օգտագործող հանցագործներից մեկն է։

«Մենք գիտենք, որ նա գնել է Թուրքիայի քաղաքացիություն և համաձայն թուրքական Սահմանադրության՝ չի կարող արտերկիր ուղարկվել դատաքննության»,-ասել է նա։

Թուրքիայի կառավարությունը սկսել է «Ոսկե անձնագիր» ծրագիրը 2018 թվականին, որը քաղաքացիություն է շնորհում 400,000 դոլարի ներդրման դիմաց։ Այս ծրագրի նպատակն է գրավել ներդրողներին ու զարգացնել շինարարական ոլորտը՝ չնայած ընդդիմության քննադատություններին։

Էմմա Չոբանյան