Ղարաբաղը հանվել է Փաշինյանի զեկույցից. ինչպես է խնդիրը ներկայացվում կառավարության փաստաթղթում. ՏԵՍԱՆՅՈւԹ

Հայաստանը հնարավոր բոլոր քայլերը կկատարի, որ Ադրբեջանի հետ հնարավորինս շուտ խաղաղության պայմանագիր կնքվի․ այս մասին այսօր խորհրդարանում հայտարարել է Նիկոլ Փաշինյանը։ Ըստ վարչապետի՝ դա հնարավոր կլինի, եթե Երևանն ու Բաքուն կատարեն իրենց ստանձնած պարտավորությունները։

Փաշինյանի ելույթից պարզ է դառնում, որ քաղաքացիների դռները թակելու և բացատրելու գլխավոր ուղերձն այն է, որ ՀՀ տարածքը 29 800 քկմ է և Ադրբեջանին որևէ տարածքային պահանջ չի ներկայացվելու։ Նիկոլ Փաշինյանն ասում է՝ ինքը կգնա այս քայլին, միայն թե ՀՀ-ն զարգանա։

Փաշինյանն այսօր խորհրդարան էր եկել կառավարության 2021-26 թթ․ ծրագրի 2022-ի ընթացքը զեկուցելու համար։ Կատարողականի մասին զեկույցում շուրջ չորս էջ անդրադարձ կա նաև հայ-ադրբեջանական բանակցություններին։ Նշվում է, որ տեղի է ունեցել խաղաղության և հարաբերությունների հաստատման պայմանագրի վրա աշխատանքի երեք շրջափուլ, որոնց ընթացքում Հայաստանն ու Ադրբեջանը փոխանակել են դիտարկումներ և առաջարկություններ:

Հիշեցնենք, որ ավելի վաղ ՀՀ իշխանությունները հայտարարել էին, որ Բաքուն ակնհայտ պահանջ առաջ քաշում պայմանագրի շրջանակներում, որ Արցախը ճանաչվելու է Ադրբեջանի մաս, ինչին հայկական կողմը դեմ է։

Կառավարության 2022 թվականի կարատողականի զեկույցում անդրադարձ չկա Արցախի կարգավիճակին։ Եթե 2021-26 թթ․ ծրագրում Փաշինյանի կառավարությունը գրել էր, որ Հայաստանի Հանրապետությունը շարունակելու է լինել Արցախի ժողովրդի անվտանգության երաշխավորը և շարունակելու է աշխատել Արցախի ժողովրդի իրավունքների պաշտպանության ուղղությամբ:

Իսկ այսօր խորհրդարանին ներկայացված փաստաթղթում «Ղարաբաղյան Հիմնախնդիր» ենթագլուխը չկար, արցախյան հիմնախնդիրը ներկայացված էր «Հայաստան-Ադրբեջան բանակցային գործընթաց» ենթագլխում։
Կառավարության կատարողականի քննարկմանը ներկա էին նաև ընդդիմադիրները։ «Հայաստան» խմբակցությունից Արթուր Խաչատրյանը Նիկոլ Փաշինյանից հետաքրքրվեց՝ ինչպես է պատկերացնում Արցախի ապագա կարգավիճակը։ Փաշինյանն ուղիղ պատասխան չտվեց։

Փաշինյանի ներկայացրած այս հակասական զեկույցի ֆոնին հիշարժան է դառնում նաև այն, որ ՔՊ-ն պատերազմից հետո արտահերթ ընտրությունների նախընտրական ծրագրում ներկայացրել էր նաև Շուշիի և Հանդրութի դեօկուպացիայի մասին խոստումներ։ Արդյոք ազատագրմանն ուղղված աշխատանքեր տարվել են․ այս մասին զեկույցում որևէ խոսք չեղավ։ Մինչ այդ Ալիևը այսօր դարձյալ սպառնալիքներ է հնչեցրել ՀՀ հասցեին և էթնիկ զտման անթաքույց ակնարկ արել, հայտարարելով, թե «Արցախի հայերը կա՛մ պետք է ընդունեն Ադրբեջանի քաղաքացիություն, կա՛մ հեռանան և բնակության այլ վայր գտնեն», իսկ ՀՀ-ն «պետք է պաշտոնապես հայտարարի, որ Ղարաբաղը Ադրբեջան է»։

Մանրամասները՝ տեսանյութում։

Նարեկ Կիրակոսյան