Քաղաքականություն
14.04.2023 | 21:53
ԱՄՆ նախկին նախագահ Դոնալդ Թրամփը կրկին հարցաքննվել է։ Նա մեղադրվում է 250 միլիոն դոլարի ֆինանսական մեքեանյությունների մեջ, գրում է DW-ի ռուսական ծառայությունը։
Նյու Յորքի գլխավոր դատախազ Լետիտիա Ջեյմսը մեղադրում է Թրամփին և նրա երեք չափահաս երեխաներին տասնամյակներ շարունակ իրենց ունեցվածքի արժեքների մասին տվյալները շահարկելու մեջ՝ շահութաբեր վարկեր և հարկային արտոնություններ ապահովելու համար։ Միացյալ Նահանգների նախկին նախագահը, որը հավակնում է 2024 թվականի նախագահական ընտրություններում Հանրապետական կուսակցությունից առաջադրման, հարցաքննության է ներկայացել առավոտյան ժամը 10-ին և միայն ժամը 18-ից հետո լքել գլխավոր դատախազությունը։ Հարցաքննությունը տեղի է ունեցել փակ դռների հետևում։
Ըստ Reuters-ի իրազեկ աղբյուրի, Թրամփը պատասխանել է իր բիզնեսի վարման վերաբերյալ հարցերին: Օգոստոսին հարցաքննության ժամանակ Թրամփը հրաժարվել էր պատասխանել հարցերին ավելի քան 400 անգամ՝ հիմնվելով ինքն իր դեմ ցուցմունք չտալու սահմանադրական իրավունքի վրա։
Ֆինանսական խարդախության գործով դատավարությունը կսկսվի հոկտեմբերի 2-ին։ Թրամփի փաստաբաններից Ալինա Հաբբան ասել է, որ նախկին նախագահը վճռական է ցուցմունք տալու հարցում և շարունակում է իր վճռականությամբ ընդգծել, որ թաքցնելու ոչինչ չունի։
