Գերմանիայի արդարադատության նախարարն ահազանգում է Էրդողանի կուսակցության նախընտրական քարոզարշավում ատելության խոսքի մասին

Գերմանիայի արդարադատության նախարար Մարկո Բուշմանը նամակ է հղել ներքին գործերի նախարար Նենսի Ֆեյզերին և արտաքին գործերի նախարար Աննալենա Բերբոքին՝ մտահոգություն հայտնելով Թուրքիայի իշխող ԱԶԿ («Արդարություն և զարգացում կուսակցություն», որի ղեկավարը Ռեջեփ Թայիփ Էրդողանն է) Գերմանիայում նախընտրական քարոզարշավում ատելության խոսքի մասին, գրում է Gercek news-ը՝ վկայակոչելով գերմանական լրատվականներին։

Մայիսի 14-ին Թուրքիայում կայանալիք նախագահական և խորհրդարանական ընտրությունների հետ կապված՝ Բուշմանն իր նամակում ընդգծել է ատելության խոսք պարունակող նախընտրական գործողությունների դեմ միջոցներ ձեռնարկելու կարևորությունը։

«Հաշվի առնելով գալիք ընտրությունները, ակնկալվում է, որ նախագահ Ռեջեփ Թայիփ Էրդողանի կողմնակիցներն ավելի ուժեղ նախընտրական քարոզարշավ կանցկացնեն նաև Գերմանիայում առաջիկա շաբաթներին: Մենք պետք է հաշվի առնենք ատելության խոսք պարունակող հաղորդագրությունների տարածումը, որոնք խաթարում են մարդու արժանապատվությունը քարոզարշավի շրջանակներում»,-ասվում է նամակում։

Այս նամակը գալիս է այն բանից հետո, երբ միջադեպ էր տեղի ունեցել ԱԶԿ պատգամավորի մասնակցությամբ, որը սպառանիքներ էր հնչեցրել․ դա Գերմանիայում մեկնաբանվել էր որպես ատելության խոսք, ԱԳՆ էր կանչել Բեռլինում Թուրքիայի դեսպանը։

Հունվարի 13-ին ԱԶԿ-ի պատգամավոր Մուստաֆա Աչըքգոզը ելույթ էր ունեցել Գերմանիայում թուրքական համագումարում և ասել. «Մենք կգտնենք և կվերացնենք նրանց այն անցքերից, որտեղ նրանք թաքնված են»։ Նա նկատի ուներ PKK-ի ու Գյուլենական շարժման անդամներին։

Գերմանացի նախարարը նամակում նշում է, որ  տեղի ունեցած միջադեպերը ցույց են տալիս, որ  որոշ թուրք պաշտոնյաներ գիտակցաբար օգտագործելու են մարդկային արժանապատվությունը վիրավորող արտահայտություններ քաղաքական մրցակիցների դեմ իրենց նախընտրական քարոզարշավում:

«Սա որևէ կերպ անընդունելի է և մտքի ազատության ակնհայտ խախտում է»,-գրում է նախարարը։

Էմմա Չոբանյան