ԱԴԾ-ն պատերազմում ՌԴ կորուստները գնահատում է 110 հազար․The New York Times

ԱԴԾ-ի հաշվարկներով Ուկրաինայում ռուսական կողմի վիրավորների ու զոհերի թիվը կազմում է մոտ 110,000 մարդ։ Այս մասին ասվում է ամերիկյան հետախուզության գաղտնազերծված փաստաթղթերում, հայտնում է The New York Times-ը, որին վկայակոչում է Meduza-ն։

Փաստաթղթերից մեկում ԱՄՆ հետախուզության աշխատակիցները նշել են, որ ԱԴԾ-ն ՌԴ ՊՆ-ին «մեղադրել է» «Ուկրաինայում ռուսական կորուստները թաքցնելու» մեջ։ Ըստ ԱԴԾ-ի վարկածի՝ ՊՆ-ն իր զեկույցներում հաշվի չի առնում Ազգային գվարդիայի մարտիկների, «Վագների» վարձկանների և Չեչնիայից Ուկրաինա ուղարկված զինվորականների կորուստները։

Ամերիկյան հետախուզության կարծիքով՝ այդ տեղեկատվությունը ցույց է տալիս զինվորականների դժկամությունը «չփոխանցելու վատ նորությունները հրամանատարության շղթայով»։

Արտահոսած փաստաթղթերում նաև ասվում է, որ ՌԴ նախագահ Վլադիմիր Պուտինը փորձել է անձամբ լուծել «Վագներ»  խմբավորման հիմնադիր Եվգենի Պրիգոժինի և պաշտպանության նախարար Սերգեյ Շոյգուի հակամարտությունը՝ նրանց փետրվարի 22-ին հրավիրելով համատեղ հանդիպման։ Պրիգոժինը ավելի վաղ բողոքել էր զինմթերքի պակասից՝ դրանում մեղադրելով Շոյգուին ու ԳՇ պետ Վալերի Գերասիմովին։

Reuters-ն էլ, վկայակոչելով արտահոսած մեկ այլ փաստաթուղթ, հայտնում է, որ, ըստ ԱՄՆ զինվորականների՝ Ռուսաստանը կորցրել է 189,5 հազարից մինչև 223 հազար մարդու, որից 35,5-43 հազարը զոհվել է։ Այդ փաստաթղթի համաձայն՝ Ուկրաինայի կորուստները կազմում են 124,5-131 հազար, որից 15,5-17,5 հազար զոհերն են։

Էմմա Չոբանյան