«Մեր ուժը փորձեցին, հետ գնացին». Տեղի բնակիչները՝ ադրբեջանական ագրեսիայի մասին. ՏԵՍԱՆՅՈւԹ

Տեղ գյուղի ուղղությամբ ադրբեջանական սանդրանքից հետո Factor TV-ի նկարահանող խումբն այսօր մեկնել էր Սյունիք՝ պարզելու գյուղում տիրող իրավիճակը և բնակչության տրամադրությունները։  Գյուղի բնակիչներից մեկը պատմում է, որ թաքնվել են հարևանի նկուղում և սպասել այնքան ժամանակ մինչև կրակոցները դադարել են։ Մեր նկարահանող խմբին ուղեկցող բնակիչը ցույց է տալիս այն հատվածը, որտեղ տեղի է ունեցել  ադրբեջանական սադրանքը։

«Էն սպիտակ վիշկեն որ կա, այ էնտեղ ա եղել։ Իսկ էն բուտկում ռուս էր կանգնած, ռուսը դուրս ա եկել, հիմա երկու շաբաթ կլինի՝ թուրքն ա մտել։ Արդեն տասը հենակետ են դրել»,- ասում է Տեղ գյուղի բնակչուհին։

«Մեր ուժը փորձեցին, հետ գնացին, բայց երևի կուտակումներ կանեն, որ էլի հարձակվեն», – ասում է Տեղի բնակիչներից մեկ ուրիշը։ Բնակիչներին նաև անհանգստացնում է զենք չունենալու խնդիրը․ ասում են՝ պետք է բնակիչներին զինել։

«Եթե թուրք գա մտնի մեր տուն, ես ի՞նչ պետք է անեմ, դատարկ ձեռով կարա՞մ զինված թուրքի դեմ պայքարեմ։ Սահմանային առաջին տունը մերն է»։

Հիշեցնենք՝ ապրիլի 11-ին՝ ժամը 16։00-ի սահմաններում, Սյունիքի մարզի Տեղ գյուղի հատվածում, ադրբեջանական զինված ուժերի մի խումբ զինծառայողներ սահմանի տեղակայման կետերի ճշգրտման պատրվակով մոտեցել են  Հայաստանի ԶՈՒ զինծառայողներին, սադրել և հրազենային զենքերից, այնուհետև՝ տարբեր տրամաչափի այլ զինատեսակներից կրակ վարել հայկական ԶՈւ զինծառայողների և դիրքերի ուղղությամբ: Հայկական կողմն ունի 4 զոհ և 6 վիրավոր։ Վիրավորում ստացած զինծառայողներից երեքի վիճակը գնահատվում է բավարար, մյուս երեքինը` համապատասխանաբար միջին ծանրության, ծանր և ծայրահեղ ծանր:

Մանրամասները՝ տեսանյութում։

Նարեկ Կիրակոսյան