27.06.2026 | 01:34
5.5 մլրդ դոլար. աշխարհի ամենաթանկ ստադիոնում ԱՄՆ-Թուրքիա հանդիպման ետնաբեմը Factor TV-ի թղթակցի աչքերով
Լավրովը ասաց Թուրքիային՝ ԼՂ-ն էլ ձեզ կտանք, ՀՀ-ից ի՞նչ պոկենք․ իշխանությունը չի՞ տեսնում սա. Ստեփան Գրիգորյան․ ՏԵՍԱՆՅՈւԹ
Քաղաքականություն
10.04.2023 | 22:02
Թուրքիայում Մևլութ Չավուշօղլուի հետ ՌԴ ԱԳ նախարար Սերգեյ Լավրովը մանրամասն քննարկել է նաև Հայաստան-Ադրբեջան, Հայաստան-Թուրքիա հարաբերությունները։ Համատեղ ասուլիսում Լավրովը հայտարարել է, թե Մոսկվան աջակցում է Երևանի և Անկարայի միջև կարգավորման գործընթացը, որը ՌԴ օգնությամբ է սկսվել․ «Ողջունում ենք տրանսպորտային կապերն ու հաղորդակցությունն ապաշրջափակելու ջանքերը։ Անշուշտ, մենք ողջունում ենք Հարավային Կովկասի հետկոնֆլիկտային վերականգնումը»։
Լավրովը նշել է, թե ՀՀ-ի, ՌԴ-ի, Ադրբեջանի ղեկավարների պայմանավորվածությունները մնում են ՀՀ-Ադրբեջան կարգավորման հիմքում, սակայն արտաքին ուժերը փորձում են խոչընդոտել․ «Հուսով ենք, որ մեր ոչ տարածաշրջանային գործընկերները չեն միջամտի այս գործընթացին, այլ կուղղորդեն կողմերին եռակողմ համաձայնագրերի խստորեն իրականացմանը»։
Նա Արարատ Միրզոյանի հետ ասուլիսում էլի դժգոհել էր Արևմուտքից, թե 3+3 ձևաչափն ուզում են քանդել՝ այդպիսով ոտնահարելով Թուրքիայի, Ռուսաստանի, Իրանի շահերը։ Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանը խնդրահարույց է համարում այն, որ ՌԴ-ի ԱԳ նախարարը Հայաստանի հարցերը քննարկում է Թուրքիայի հետ։ Ըստ փորձագետի՝ այստեղ առկա է լուրջ վտանգ, որ Հայաստանի շահերը կզոհաբերվեն։ Վերլուծելով Լավրովի հայտարարությունները, Ստեփան Գրիգորյանը նշում է․ «Թուրքիայում Լավրովը Չավուշօղլուին ասաց, որ նրանց կտա Լեռնային Ղարաբաղը, Հայաստանից էլ տարածքներ կպոկեն՝ կտան ադրբեջանցիներին և թուրքերին։ Հայաստանը չի՞ տեսնում այս ամենը, որ մեր հաշվին են քաղաքականություն վարում»։ Որպեսզի Հայաստանի շահերը չզոհաբերվեն, Ստեփան Գրիգորյանի կարծիքով՝ ՀՀ իշխանությունը պետք է ավելի ակտիվ դիվանագիտություն վարի և ՀՀ-ն գործոն դարձնի։
Հարցազրույցն ամբողջությամբ՝ տեսանյութում։
Ռոբերտ Անանյան
