Աբսուրդ է, որ Երևանը չունի գխավոր ճարտարապետ կամ ճարտարապետական խումբ, քաղաքն այսօր անտեր է. Վարդանյան. ՏԵՍԱՆՅՈՒԹ

««Հին Երևանի» երկար ձգձվելը պայմանավորված է տվյալ տարածքի իրացման աշխատանքներով: Բոլորս էլ պատկերացնում ենք` ինչ է նշանակում բնակիչներին հանել այդ տարածքներից. դա գերակա հանրային շահ ճանաչված տարածք է: Ստիպված պետք է բնակիչներին տեղահանել հասարակական նշանակության թաղամաս ստեղծելու համար: Այնպես որ ծրագիրը ձգձգվում է օբյեկտիվ պատճառներով, խնդիրները բյուրոկրատական բնույթի են»,- Factor TV-ի հետ զրույցում նշում է «Հին Երևան» նախագծի հեղինակ, ճարտարապետ Լևոն Վարդանյանը:

Անդրադառնալով որոշ ճարտարապետների այն որակմանը, որ «Հին Երևանն» ինքնին հակաթամանյանական նախագիծ է, Լևոն Վարդանյանը հակադարձում է` 1924-ին Թամանյանը կազմել է մայրաքաղաքի գլխավոր հատակագիծը, սակայն քաղաքն ապրող օրգանիզմ է, իսկ գլխավոր հատակագիծն էլ ժամանակի ընթացքում փոխվում է. «Ես յուրովի եմ մոտեցել Գլխավոր պողոտայի ֆունկցիային` պահպանելով հուշարձան շենքերը: Ես հարստացրել եմ Գլխավոր պողոտան, չեմ վերածել այն Վերնիսաժի: Ժամանակը կգա, կտեսնենք` երևանցիներն ընդունեցին համալիրը, թե ոչ»:

Ճարտարապետը խոսում է նաև Երևանի բուհերը Ակադեմիական քաղաք տեղափոխելու` Կառավարության նախագծի մասին. «Դա անհասկանալիև անթույլատրելի նախագիծ է: Թամանյանի պաշտպաններից ծպտուն չլսեցի այն մասին, որ արդեն ձևավորված ուսանողական քաղաքը փորձում են խեղել, երիտասարդությանը կտրել քաղաքի օրգանիզմից: Ո՞վ չի հասկանում, որ, օրինակ, Ֆիզկուլտինստիտուտը շշմելու տարածք է հյուրանոց կառուցելու համար. աբսուրդ է այդպես ընդառաջ գնալը բիզնեսին»:

Ճարտարապետի գնահատմամբ` աբսուրդ է նաև այն, որ Երևանը չունի գլխավոր ճարտարապետ: Լևոն Վարդանյանը կողմնակից է, որ մայրաքաղաքը ղեկավարվի ճարտարապետների` 5-7 հոգուց բաղկացած խմբի կողմից. «Ինձ համար անթույլատրելի է նաև այն, որ մեկ անհատը` գլխավոր ճարտարապետն է որոշումներ կայացնում: Իսկ այսօր Երևանն անտեր վիճակում է»:

Մանրամասները` տեսանյութում:

Աննա Բաբաջանյան