16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
Չավուշօղլուն դժգոհել է Էրդողանի մրցակցի հետ ԱՄՆ դեսպանի հանդիպումից
Քաղաքականություն
05.04.2023 | 22:47
Թուրքիայի ԱԳ նախարար Մևլութ Չավուշօղլուն Բրյուսելում ՆԱՏՕ-ի անդամ պետությունների ԱԳ նախարարների նիստի շրջանակում տեղի ունեցած ճեպազրույցում անդրադարձել է ընտրություններում ընդդիմության միասնական թեկնածու Քեմալ Քըլըչդաչօղլուի հետ Անկարայում ԱՄՆ դեսպանի հանդիպմանը, գրում է TRT Haber-ը։
Չավուշօղլուն խոսել է այս հանդիպմանը նախագահ Ռեջեփ Թայիփվ Էրդողանի արձագանքից։ Հիշեցնենք՝ Էրդողանը հայտարարել էր, որ իր դռները փակ են ԱՄՆ դեսպանի առաջ։
«Այս ընտրություններում Ամերիկային պետք է դաս տանք։ Ջո Բայդենն այնտեղից է խոսում․ ի՞նչ է անում այստեղ Բայդենի դեսպանը, գնում է պարոն Քեմալին այցելում։ Ամո՛թ է, գլուխդ գործածիր։ Դուք դեսպան եք, Ձեր զրուցակիցն այստեղ նախագահն է։ Այսուհետև ի՞նչ դեմքով եք նախագահից հանդիպու խնդրելու։ Մեր դռները նրա առաջ փակ են, նրան այլևս չեք տեսնի։ Ինչո՞ւ, Ձեր տեղը կիմանաք, դեսպանի ձեր պարտականությունը կիմանաք, կիմանաք, թե ինչպես է աշխատում դեսպանը։ Եթե սա չսովորեք, չեք կարող ներս մտնել»,- ասել էր Թուրքիայի նախագահը։
Չավուշօղլուն ևս դժոգոհություն է հայտնել՝ նշելով, որ ճիշտ չէ, որ դեսպանն «ընտրական մթնոլորտում հանդիպում է թեկնածուի հետ»։
«Նա չպետք է ձևացնի, թե որևէ կողմ է բռնում։ Երեկ ես իմ մտքերը հայտնել եմ ԱՄՆ պետքարտուղար Էնթոնի Բլինքենին։ Նորմալ պայմաններում դեսպանները կարող են հանդիպել այդ երկրում ցանկացածի հետ։ Մեր կարծիքն էլ են ստանում, նման շփումներ կան, բայց ընտրական մթնոլորտում ընդունելի չէ, որ դեսպանը գնա, հանդիպի թեկնածուի հետ ու կողմնորոշի։ Ահա թե ինչու էր մեր նախագահի արձագանքն այդպիսին»,- ասել է թուրք նախարարը։
Հավելենք, որ օրերս Թուրքիայում ԱՄՆ դեսպան Ջեֆ Ֆլեյքը հանդիպել էր մայիսի 14-ին կայանալիք նախագահական ընտրություններում ընդդիմության (6 ընդդիմադիր կուսակցությունների դաշինք) միասնական թեկնածու, Ժողովրդահանրապետական կուսակցության նախագահ Քեմալ Քըլըչդարօղլուի հետ։
Էմմա Չոբանյան
