27.06.2026 | 01:34
5.5 մլրդ դոլար. աշխարհի ամենաթանկ ստադիոնում ԱՄՆ-Թուրքիա հանդիպման ետնաբեմը Factor TV-ի թղթակցի աչքերով
ՌԴ-ն Ղրիմում խրամատների և պատնեշների ցանց է կառուցել․ The Washington Post
Քաղաքականություն
04.04.2023 | 13:07
The Washington Post պարբերականը հետաքննություն է հրապարակել բռնակցված Ղրիմում ՌԴ-ի կողմից պաշտպանական կառույցների ակտիվ ստեղծման վերաբերյալ։ Արբանյակային լուսանկարների հիման վրա, որոնք ներկայացվել են Maxar ընկերության կողմից, պարբերականը ցույց է տալիս, որ ընդամենը մի քանի շաբաթում ռուսական ուժերը կարողացել են Ղրիմում խրամատների ու պատնեշների մի ամբողջական ցանց կառուցել։
Հրապարակման մեջ Ղրիմն անվանվում է պատերազմի գոտում «ամենից շատ ամրացված գոտի»։
Թերթը հրապարակել է նաև Ղրիմի Մեդվեդևկա գյուղի լուսանկարները, որը տեղակայված է ցամաքի անցման մոտ: Փետրվարի 11-ին արված նկարում Սիվաշ լճի կողմից երևում է խրամատների մի ամբողջ ցանց, որոնց երկարությունը որոշ դեպքերում գերազանցում է 900 մետրը։
Հրատարակության տվյալներով՝ վերջին շաբաթներին, երբ Ռուսաստանը սպասում է Ուկրաինայի կողմից գարնանային հակահարձակման, նման պաշտպանական կառույցներ սկսել են հատկապես արագ հայտնվել։ Ղրիմի Սաակի շրջանի Վիտինո գյուղում փետրվարի 27-ին արված նկարում պատկերված է դատարկ ափ, սակայն արդեն մարտի 12-ին ծովի մոտ խրամատների շարան է հայտնվել, գրում են լրագրողները։
Վիտինոյի մոտ արված նկարներից մեկում երևում է նաև խրամատներում տեղադրված մի քանի հրետանի։
«Որոշ վերլուծաբաններ ասում են, որ նման զինատեսակների առկայությունն ակտիվ ռազմական գործողություններից հեռու գոտում դժվար է բացատրել»,- նշում են հրապարակման հեղինակները։
Միաժամանակ, նրանք հիշեցնում են, որ ռուս զինվորականները խրամատներ փորելու համար օգտագործում են և՛ կենդանի ուժ, և՛ տեխնիկա (այս կապակցությամբ լրագրողները խոսում են խորհրդային տարիներին ստեղծված ԲՏՄ-3-ի մասին, որն ի վիճակի է խրամատներ փորել մինչև ժամում 800 մետր արագությամբ):
«Համացանցում գովազդներ են տեղադրվել, որոնցում ասվում է, որ աշխատողներ են փնտրվում՝ խրամատները բետոնով և փայտով ամրացնելու համար օրական ավելի քան 90 դոլարով, իսկ սա նախանձելի աշխատավարձ է»,- ասվում է հրապարակման մեջ։
Պաշտպանական կառույցներից շատերը հայտնվել են բնական ջրային պատնեշների մոտ, ինչպիսիք են ծովափը կամ ջրանցքները, որոնք լրացուցիչ արգելքներ են ստեղծում Ուկրաինայի զինված ուժերի հարձակման դեպքում։
Հրատարակությունը նաև մեջբերել է փորձագետների, ովքեր չեն հավատում Ղրիմի վրա լայնամասշտաբ գրոհի կամ ցամաքում զորքեր իջեցնելու՝ ուկրաինական օպերացիայի մեծ հավանականությանը։
Ըստ ԱՄՆ-ի ռազմածովային վերլուծության կենտրոնի ռուսական ծրագրի տնօրեն Մայքլ Քոֆմանի՝ Ուկրաինան դժվար թե որոշի Ղրիմը գրավել «դասական իմաստով», այլ ավելի շուտ կդիմի թերակղզու մշտական հյուծման և կրակային վերահսկողության տակտիկային:
Տաթև Ֆռանգյան
