Լավրովն ու Բլինքենը հեռախոսազրույց են ունեցել

Ռուսաստանի արտգործնախարար Սերգեյ Լավրովը և ԱՄՆ պետքարտուղար Էնթոնի Բլինքենը հեռախոսազրույց են ունեցել, որի գլխավոր թեման Ռուսաստանում լրտեսության գործով The Wall Street Journal-ի թղթակից Էվան Գերշկովիչի ձերբակալությունն էր, հետևում է ԱՄՆ Պետդեպարտամենտի և Ռուսաստանի արտաքին գործերի նախարարության հայտարարություններից:

Ռուսաստանի ԱԳՆ-ում հստակեցրել են, որ զրույցը տեղի է ունեցել ամերիկյան կողմի նախաձեռնությամբ:

«Ռուսաստանում լրտեսության մեջ կասկածվող ԱՄՆ քաղաքացի Գերշկովիչի ձերբակալության վերաբերյալ պետքարտուղարի կողմից բարձրացված հարցի քննարկման համատեքստում Բլինքենի ուշադրությունն է դարձվել Ռուսաստանի իշխանությունների՝ օրենսդրությանը և Ռուսաստանի Դաշնության միջազգային պարտավորություններին համապատասխան ընդունված որոշումները հարգելու անհրաժեշտությանը»,– ասվում է ՌԴ ԱԳՆ հայտարարության մեջ:

Լավրովը զրույցի ընթացքում ընդգծել է «Վաշինգտոնում և արևմտյան ԶԼՄ-ներում պաշտոնատար անձանց կողմից աժիոտաժ հրահրելու անթույլատրելիությունը՝ այդ գործին քաղաքական երանգ հաղորդելու ակնհայտ մտադրությամբ», հավելել են գերատեսչությունում:

Բլինքենը զրույցի ընթացքում պնդել է, որ Ռուսաստանի իշխանությունները Գերշկովիչին անհապաղ ազատ արձակեն կալանքից, ինչպես նաև մեկ այլ ամերիկացի Փոլ Ուիլանին, որը Ռուսաստանում 16 տարվա ազատազրկման է դատապարտվել լրտեսության մեղադրանքով, հաղորդում է The Wall Street Joutnal-ը՝ հղում անելով ԱՄՆ Պետդեպարտամենտին։

«Բլինքենը փոխանցել է Միացյալ Նահանգների լուրջ մտահոգությունը Ռուսաստանի կողմից ԱՄՆ քաղաքացի լրագրողի անընդունելի ձերբակալության կապակցությամբ»,- հայտարարել են ամերիկյան գերատեսչությունում:

ԱԴԾ-ն Գերշկովիչին լրտեսության կասկածանքով ձերբակալելու մասին հայտարարել է մարտի 30-ի առավոտյան:

Լրագրողը ձերբակալվել է Եկատերինբուրգում, այնուհետև նրան տեղափոխել են Մոսկվա, որտեղ Լեֆորտովի դատարանը նրան կալանավորել է:

Թերթի ղեկավարությունը հերքել է ԱԴԾ-ի մեղադրանքները և կոչ արել անհապաղ ազատ արձակել իր լրագրողին:

ԱՄՆ պետդեպարտամենտը Գերշկովիչի ձերբակալությունից հետո Ռուսաստանում գտնվող բոլոր ամերիկացիներին կոչ է արել անհապաղ լքել երկիրը: