12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
ԵՄ-ն սպասում է Մինսկի արձագանքին միջուկային զենքի տեղակայման մասին Պուտինի հայտարարությանը․ Ստանո
Քաղաքականություն
27.03.2023 | 17:18
Ռուսաստանի կողմից Բելառուսում մարտավարական միջուկային զենքի տեղակայումը «հետագա էսկալացիա և ուղղակի սպառնալիք կլինի եվրոպական անվտանգության համար»։ Այս մասին Բրյուսելում կայացած ճեպազրույցում հայտարարել է ԵՄ արտաքին քաղաքականության ծառայության խոսնակ Պիտեր Ստանոն, գրում է DW-ի ռուսական ծառայությունը։
«Մենք չենք տեսել հաստատումներ բելառուսական կողմից, որ դա օրակարգում է կամ երբևէ տեղի կունենա, բայց եթե դա տեղի ունենա, իհարկե, կլինեն հետևանքներ»,- ասել է նա։
Ստանոն նաև կոչ է արել սպասել ՌԴ նախագահ Վլադիմիր Պուտինի հայտարարությանն Ալեքսանդր Լուկաշենկոյի ռեժիմի արձագանքին, որն «արդեն իսկ հանդիսանում է անօրինական ագրեսիայի մեղսակից»։
Մինչ այս Եվրամիության դիվանագետության ղեկավար Ժոզեպ Բորելը նախազգուշացրել էր, որ Բրյուսելը պատրաստ է նոր պատժամիջոցներ կիրառել, եթե Մոսկվան մարտավարական միջուկային զենք տեղակայի Բելառուսի տարածքում։
Ստանոն ճեպազրույցում հաստատել է, որ նման քայլը չի մնա անպատասխան ԵՄ երկրների կողմից, սակայն հրաժարվել է պատժամիջոցները քննարկել՝ նախքան ԵՄ Խորհրդի կողմից դրանց ընդունումը, քանի որ այդ ընթացակարգը խիստ գաղտնի է։
«Մենք պատրաստ ենք ցանկացած սցենարի և վերանայում ենք այդ նախապատրաստական աշխատանքները հակամարտությունը ծավալվելու և ագրեսիայի սրման հետ կապված: Պատժամիջոցների վերաբերյալ յուրաքանչյուր որոշում կապված է կոնկրետ իրադարձությունների հետ: Այսպիսով, նրանք, իհարկե, հաշվի կառնեն նոր զարգացումները, էսկալացիան և համապատասխանաբար կհարմարեցվեն»,- ասել է Ստանոն։
Այժմ ԵՄ երկրները դիտարկում են Բելառուսի դեմ պատժամիջոցների նոր փաթեթը, որն առաջարկել էր Եվրահանձնաժողովը փետրվարին։
Էմմա Չոբանյան
