Միջազգային արբիտրաժի որոշումից հետո Անկարան դադարեցրել է իրաքյան Քուրդիստանից նավթի մատակարարումները

Թուրքիան շաբաթ օրը դադարեցրել է նավթի արտահանումը Իրաքի ինքնավար Քուրդիստանից՝ Միջազգային առևտրի պալատում արբիտրաժից հետո։ Turkish Minute-ի փոխանցմամբ՝ այս մասին հայտնում է Agence France-Presse-ը՝ վկայակոչելով Իրաքի Նավթի նախարարությանը։

«Թուրքիան տեղեկացրել է Իրաքի Քուրդիստանի իշխանություններին ներմուծման դադարեցման մասին»,- ասել է նախարարության մամուլի խոսնակ Ասսեմ Ջիհադը։

Իրաքի պաշտոնյաները, որոնք վերահսկում են արտահանումը Թուրքիայի Ջեյհան նավահանգստով, նշել են, որ արդյունահանումը դադարեցվել է 2023 թվականի մարտի 25-ին՝ տեղական ժամանակով 12:35-ին։ Ասսեմ Ջիհադը հաստատել է տեղեկությունը:

Թուրքիայի իշխանությունների կողմից դեռևս լուրի հաստատում չկա։

Բաղդադը հայտարարել է, որ Փարիզում գործող Միջազգային առևտրի պալատի արբիտրաժային տրիբունալն ընդունել է Բաղդադի պահանջներն Անկարայի հետ վեճում, թե ով է պատասխանատու ինքնավար շրջանի նավթի արտահանման համար:

Իրաքը 2014 թվականին դատավարություն է սկսել հարևան Թուրքիայի դեմ՝ պահանջելով Քուրդիստանի նավթի արտահանման բացառիկ իրավունքներ։ Սակայն, ի հեճուկս Բաղդադի, Էրբիլի տարածաշրջանային կառավարությունը շարունակում էր նավթ արտահանել Թուրքիայի տարածքով՝ օրական մոտ 450,000 բարել:

Իրաքի Նավթի նախարարությունը հայտնել է, որ Փարիզի արբիտրաժային տրիբունալը որոշել է, որ Բաղդադի նավթի շուկայավարման պետական կազմակերպությունը «միակ կազմակերպությունն է, որը լիազորված է կառավարել արտահանումը»:

Քուրդիստանի վարչապետ Մասրուր Բարզանին ասել է, որ իր կառավարությունը ներկայացնող պատվիրակությունն այցելելու է Բաղդադ՝ բանակցությունների համար:

Նշենք, որ նավթը միշտ զգայուն թեմա է եղել Բաղդադի և Էրբիլի հարաբերություններում և երկու կառավարությունների համար էլ եկամուտների հիմնական աղբյուրն է:

Էմմա Չոբանյան