Իսրայելում ցուցարարները փորձել են ներխուժել Նեթանյահուի նստավայր․ ՏԵՍԱՆՅՈՒԹ

Իսրայելում տասնյակ հազարավոր ցուցարարներ փակել են Թել Ավիվի գլխավոր մայրուղին և բախվել ոստիկանության հետ Երուսաղեմում վարչապետի նստավայրի մոտ։ Բողոքի ալիքը ծավալվել էր այն բանից հետո, երբ Նեթանյահուն պաշտոնանկ էր արել պաշտպանության նախարար Յոավ Գալանտին, որը հանդես էր եկել դատական բարեփոխումները դադարեցնելու կոչով, գրում է Reuters-ը։

Ընդդիմության առաջնորդներ Յաիր Լապիդը և Բենի Գանցը համատեղ հայտարարությամբ կոչ են արել Նեթանյահուի «Լիկուդ» կուսակցության անդամներին զերծ մնալ «ազգային անվտանգությունը ոչնչացնելուց» ՝ նշելով, որ վարչապետը «հատել է կարմիր գիծը»։ «Պետական անվտանգությունը չի կարող խաղաքարտ լինել քաղաքական խաղում», – հայտարարել են Լապիդը և Գանցը:

Ցուցարարները մի քանի խարույկ են վառել Թել Ավիվի գլխավոր Այալոն մայրուղու վրա՝ ամբողջությամբ փակելով երթևեկությունը: Մեծ բազմություն է հավաքվել Նեթանյահուի նստավայրի մոտ, ցուցարարներին մի պահ հաջողվել է ճեղքել անվտանգության շղթան, բայց ոստիկանները ջրցան մեքենաներով հետ են մղել  նրանց։

Financial Times-ն էլ գրում է, որ մի քանի համալսարաններ ի նշան ցուցարարների հետ համերաշխության այսօրվանից գործադուլ են հայտարարել։ Նյու Յորքում Իսրայելի գլխավոր կոնսուլ Ասաֆ Զամիրը հրաժարական է տվել։ «ՊՆ նախարարի պաշտոնանկության այսօրվա վտանգավոր որոշումն ինձ համոզել է, որ ես այլևս չեմ կարող ներկայացնել այս կառավարության շահերը»,- Թվիթերում գրել է Զամիրը։
Իսրայելի նախագահ Իցհակ Հերցոգը ևս առավոտյան կոչ է արել Նեթանյահուին և կառավարության անդամներին դադարեցնել դատական համակարգի բարեփոխումների անցկացման գործընթացը։

«Հանուն Իսրայելի ժողովրդի հետ միասնության, հանուն ձեզ վրա դրված պատասխանատվության, կոչ եմ անում անհապաղ դադարեցնել օրենսդրական գործընթացը։ Կոչ եմ անում Կնեսետի բոլոր խմբակցությունների ղեկավարներին՝ ինչպես կոալիցիայի, այնպես էլ ընդդիմության ղեկավարներին, ամեն ինչից վեր դասել երկրի քաղաքացիների շահերը և առանց հապաղելու գործել պատասխանատու և խիզախ»,- Թվիթերում գրել է Հերցոգը։

Դեկտեմբերին վարչապետի պաշտոնը ստանձնած Նեթանյահուն հայտարարել էր Գերագույն դատարանի դատավորների ընտրության վերահսկողությունը խորհրդարանին փոխանցելու ու սահմանադրական սկզբունքից հրաժարվելու մասին, որի հետևանքով Գերագույն դատարանը զրկվում է կառավարության որոշումները չեղարկելու իրավասությունից։ Այս որոշումը իսրայելցիների դժգոհությունն էր հարուցել ու հանգեցրե բողոքի ցույցերի։

Տաթև Ֆռանգյան