Կասկադի ծառերը հատում եք` առանց բնակիչների հետ հանդիպելո՞ւ. դա սև օր էր Երևանի համար. Մնացականյան․ ՏԵՍԱՆՅՈւԹ

«Մասշտաբային ծառահատման օրը Երևանի համար սև օր էր: Բայց մեր քաղաքն անտեր չէ, նոր Երևան է զարթնում. այս ծառահատումը համախմբեց բոլորիս: Կասկադի ծառերը հատում եք` առանց բնակիչների հետ հանդիպելո՞ւ. ցավոք, չկա դիալոգ քաղաքային իշխանության և երևանցիների միջև:

Ցավալի է նաև, որ Երևանի ավագանու անդամներից հատուկենտ մարդիկ արձագանքեցին ծառահատմանը. այդ 64 հոգին ինչի՞ համար են ավագանիում»,-Factor TV-ի հետ զրույցում նման տեսակետ է հայտնում Երևանի Կենտրոն վարչական շրջանի նախկին ղեկավար Վիկտոր Մնացականյանը` անդրադառնալով օրերս Կասկադի հարևանությամբ մայթեզրին իրականացված լայնամասշտաբ ծառահատումներին:

Նրա խոսքով` թեղիները հատելու փոխարեն հարկավոր էր պարարտացնել, մշակել դրանք, սրսկումներ իրականացնել: Վիկտոր Մնացականյանը շեշտում է` այդ ծառերը ևս 100 տարի կարող էին ծառայել մեր քաղաքին: Անդրադառնալով Երևանի փոխքաղաքապետ Տիգրան Ավինյանի այն պնդմանը, թե Կասկադում հատված ծառերն արդեն չէին կատարում փոշին կլանելու և օդը ֆիլտրելու գործառույթ, մեր զրուցակիցը նշում է. «Փոխքաղաքապետին մոլորեցնում են, իր, շրջապատի ինքնավստահ պահվածքը հիմնավորում է կասկածներն այն մասին, որ չեն տիրապետում որևէ բանի…Մարդիկ հորինել են խելոք բառեր` «կենսունակության կորուստ», «խիստ դեֆորմացված ծառեր» և թաքնվում են դրանց տակ, փորձում են թմրեցնել մեզ»: Ի դեպ, փոխքաղաքապետը նաև կարծում է, որ Երևանում պետք է լինեն ծիրանենիներ:

Կենտրոն վարչական շրջանի նախկին ղեկավարը, սակայն, պնդում է` Փոքր կենտրոնում չեն կարող լինել պտղատու ծառեր. «Դրանց տեղն այգիներն են, ծիրանի ծառերին նույնիսկ ամառանոցներում մարդիկ չեն հասցնում տիրություն անել»:

Մանրամասները` տեսանյութում:

Աննա Բաբաջանյան