13.01.2025 | 23:21
Հասմիկ Տոլմաջյանը նշանակվել է Շվեյցարիայում ՀՀ դեսպան
ԱՆ-ն կես միլիարդ դրամի պայմանագիր է կնքել Խաչատուր Սուքիասյանի հետ փոխկապակցված «ՍԻԼ ինշուրանս»-ի հետ
Հասարակություն
24.03.2023 | 21:42
ՀՀ Առողջապահության նախարարությանը բավական խոշոր գումարի չափով պայմանագիր է կնքել ԱԺ «Քաղաքացիական պայմանագիր» խմբակցության պատգամավոր Խաչատուր Սուքիասյանի ընտանիքին պատկանող «ՍԻԼ ինշուրանս» ապահովագրական փակ բաժնետիրական ընկերության հետ: Հեղափոխությունից հետո Սուքիասյանի անվան հետ առնչվող ընկերությունները դարձել են իշխանության առաջնային գործընկերներից։
Մասնավորապես, այս անգամ Առողջապահության նախարարությունը մեկ տարվա ընթացքում ավելի քան կես միլիարդ գումար կփոխանցի «ՍԻԼ Ինշուրանս»-ին, որն էլ իր հերթին պետական հիմնարկների և կազմակերպությունների աշխատողներին կմատուցի բժշկական օգնություն և սպասարկման ծառայություններ։
Ըստ պայմանագրի՝ 111 միլիոն 852 հազար 500 դրամ արդեն իսկ փոխանցվել է ՓԲԸ-ին, իսկ մինչև դեկտեմբերի 15-ն այդ գումարը կդառնա 536 892 294 դրամ։ Յուրաքանչյուր ապահովագրված անձի համար ապահովագրման գումարը սահմանված է 10 միլիոն դրամ։
Հիվանդանոցային բժշկական օգնությունը և սպասարկումը ներառում են բուժման համար անհրաժեշտ միջոցառումները, այդ թվում՝ բժշկական խորհրդատվությունը, հիվանդանոցային բուժման ընթացքում իրականացվող բոլոր լաբորատոր հետազոտությունները, պացիենտին հիվանդանոցային սենյակով ապահովելը և այլն։
Հատկանշական է, որ պայմանագրով նախատեսված ծառայություններից օգտվելու համար ապահովագրված անձը պետք է դիմի բացառապես առողջապահության նախարարի հրամանով սահմանված ցանկում ընդգրկված բժշկական հաստատություններ։
Պայմանագիրը կնքվել է ՀՀ ԱՆ գլխավոր քարտուղար Վարդանուշ Գրիգորյանի և «ՍԻԼ Ինշուրանս» ԱՓԲԸ տնօրեն Արմինե Մելքոնյանի միջև։
Նշենք, որ միայն այս տարի Ազգային ժողովը երեք պայմանագիր է կնքել «ՍԻԼ Ինշուրանս»-ի հետ՝ մեքենաների ապահովագրության վերաբերյալ։ Սա միակ դեպքը չէ, երբ պետական գերատեսչությունները և կառույցները ծառայությունների մատուցման պայմանագիր են կնքում իշխող ուժի կամ նրա հետ փոխկապակցված որևէ ընկերության հետ։ Ուշագրավ է, որ այս գործընթացում անմասն չեն մնում նաև «նախկինները». Ներքին գործերի նախարարության ոստիկանությունը և Ազգային ժողովն այս տարի մի շարք խոշոր պայմանագրեր են կնքել ՀՀ երկրորդ նախագահ Ռոբերտ Քոչարյանի որդուն՝ Սեդրակ Քոչարյանին պատկանող «Տոյոտա Երևան» ընկերության հետ։
Ռոզա Վարդանյան
