Ֆրանսիայում կենսաթոշակային բարեփոխումների հակառակորդները Մակրոնի հրաժարականն են պահանջում

Ֆրանսիայում հինգշաբթի զանգվածային գործադուլներ են տեղի ունենում, մասնավորապես՝ տրանսպորտի ու կրթության ոլորտներում, հայտնում են ֆրանսիական լրատվամիջոցները։

Կենսաթոշակային բարեփոխումներից դժգոհ ֆրանսիացիները գործադուլներ են կազմակերպել Փարիզի օդանավակայաններում՝ դժվարացնելով Շառլ դը Գոլ օդանավակայանի 1-ին տերմինալ մուտքը․ այստեղ երկար խցանումներ են, գրում է CNBC-ն։

Քաղաքացիական ավիացիայի վարչությունը մտավախություն ունի, որ իրավիճակը կվատթարանա, և պահանջում է չեղարկել ուրբաթ օրվա թռիչքների 30%-ը Օրլի օդանավակայանում ուրբաթ օրը, շաբաթ օրվա թռիչքների 15%-ը, ինչպես նաև 20%-ական տոկոսով՝ Մարսելի, Բորդոյի և Լիոնի օդանավակայաններում թռիչքները։

Փարիզի մետրոյի կայարանների մեծ մասում երթևեկության խափանումներ են նկատվում։ Այս խնդիրն անդրադարձել է նաև մերձքաղաքային գնացքների վրա։

Լիոնում ցուցարարներն արգելափակել են կայարանների աշխատանքը։ Նրանք ճանապարհ են դուրս եկել արհմիությունների դրոշներով։ Ցուցարարները պահանջում են Ֆրանսիայի նախագահ Էմանուել Մակրոնի հրաժարականը։

Գործադուլին միացել են բազմաթիվ ուսուցիչներ, Փարիզում փակվել է 140 տարրական դպրոց, ինչպես նաև բազմաթիվ միջնակարգ ուսումնական հաստատություններ։ Մայրաքաղաքի քաղաքապետարանի տվյալներով՝ հինգշաբթի դպրոցների ուսուցիչների 56 տոկոսը գործադուլ է հայտարարել։ Ուսուցիչների արհմիությունը հայտարարել է, որ Փարիզում գործադուլ է հայտարարել մասնագետների 70%-ը։

Ռուանի, Մարսելի, Տուլուզի և Ֆրանսիայի այլ քաղաքների մի շարք դպրոցների աշխատակիցներ աշխատանքի չեն դուրս եկել։

Փարիզում շարունակվում է աղբահանությամբ զբաղվող ընկերությունների աշխատակիցների գործադուլը։ Փողոցները լցված են աղբի տոպրակների կույտերով։ Փարիզի քաղաքապետարանից BFM-TV-ին հայտնել են, որ հինգշաբթի քաղաքում չհավաքված աղբի ծավալը հասել է 9,6 հազար տոննայի։

Տաթև Ֆռանգյան