18.09.2026 | 15:38
Ռուբեն Վարդանյանը դիմել է Ադրբեջանի ՄԻՊ-ին՝ բարձրաձայնելով Ումբակիում պահվող հայերի իրավունքների խախտումների մասին
ԵՄ-ՀՀ վիզաների տրամադրումը դյուրացնելու մասին համաձայնագրի մշտադիտարկման 4-րդ հաշվետվությունը պատրաստ է. ԳՏՀՎԿ
Քաղաքականություն
22.06.2018 | 11:22
«Գլոբալիզացիայի և տարածաշրջանային համագործակցության վերլուծական կենտրոնը (ԳՏՀՎԿ), լինելով ԵՄ-ի հետ շարժունության, մուտքի արտոնագրերի, անօրինական միգրացիայի, ռեադմիսիայի ու վերաինտեգրման ոլորտներում Հայաստանի առաջատար կազմակերպություններից մեկը, 2014 թվականից ի վեր իրականացնում է ԵՄ և ՀՀ միջև վիզաների տրամադրումը դյուրացնելու մասին և առանց թույլտվության բնակվող անձանց հետընդունման (ռեադմիսիայի) մասին համաձայնագրերի մոնիտորինգ». ասված է Գլոբալիզացիայի և տարածաշրջանային համագործակցության վերլուծական կենտրոնի տարածած հաղորդագրությունում:
ԳՏՀՎԿ-ի կողմից իրականացվող` ԵՄ և ՀՀ միջեւ վիզաների տրամադրումը դյուրացնելու մասին համաձայնագրի մշտադիտարկման չորրորդ հաշվետվության արդյունքները արդեն պատրաստ են և շուտով կհրապարակվեն: Մշտադիտարկումը իրականացվում է Բաց հասարակության հիմնադրամներ – Հայաստանի աջակցությամբ:
2017թ. նոյեմբերի 24-ին ստորագրված ՀՀ-ԵՄ Համապարփակ և ընդլայնված գործընկերության համաձայնագիրը (ՀԸԳՀ) նոր էջ բացեց ՀՀ-ԵՄ հարաբերություններում։ Իսկ արդեն Հայաստանի ներքաղաքական վերջին դեպքերից հետո ակտիվացել են նաև ԵՄ-ՀՀ հարաբերությունների շրջանակներում ձեռնարկվող քայլերը:
Մասնավորապես, կարևորում ենք ՀՀ ԱԳ նախարար Զ. Մնացականյանի 2018թ. հունիսին Բրյուսելում աշխատանքային այցի ընթացքում տեղի ունեցած մի քանի իրադարձություններն ու հանդիպումները.
- հանդիպում Միգրացիայի, ներքին գործերի և քաղաքացիության հարցերով ԵՄ հանձնակատար Դիմիտրիս Ավրամոպուլոսի հետ,
- Բենիլյուքսի երկրների հետ ռեադմիսիայի համաձայնագրի ստորագրման արարողություն,
- հանդիպում ԵՄ արտաքին գործերի և անվտանգության քաղաքականության հարցերով բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինիի հետ,
- ՀՀ-ԵՄ գործընկերության խորհրդի առաջին նիստ:
Հանդիպումների ընթացքում նորից ընդգծվեց ԵՄ-ի հետ համագործակցության հետագա խորացման հեռանկարները, ինչպես նաև Հայաստանում բարեփոխումների և զարգացման օրակարգի խթանման անհրաժեշտությունը:
ԳՏՀՎԿ-ն հույս է հայտնում, որ արձանագրված ձեռքբերումները մեծապես կնպաստեն արտոնագրային ռեժիմի ազատականացման, ազատ տեղաշարժի երկխոսության արագացմանը և դրա հետ փոխկապակցված մի շարք այլ ոլորտներում գործընթացների խթանմանը:
ԳՏՀՎԿ-ն հաշվի առնելով ՀՀ նոր իշխանությունների պատրաստակամությունն ու քաղաքական կամքը խթանելու բարեփոխումների ընթացքը, մասնավորապես՝ ԵՄ-ի հետ Վիզաների ազատականացման փուլին անցնելու հնարավորությունը, ուշադիր հետևում է դեպքերի զարգացմանը: ԳՏՀՎԿ-ն ևս իր հերթին վերահաստատում է իր պատրաստակամությունը աջակցել ՀՀ իշխանություններին՝ ներդնելով վերոնշյալ ոլորտներում իր ողջ փորձն ու կարողությունները:
Համոզված ենք, որ վերոնշյալ ոլորտներում ՀՀ իշխանությունների ակտիվությունը թույլ կտա կարճ ժամանակահատվածում գրանցել իրական հաջողություններ, մասնավորապես ՀՀ-ԵՄ Համապարփակ և ընդլայնված գործընկերության համաձայնագրի (ՀԸԳՀ) վավերացումից և ուժի մեջ մտնելուց հետո վիզաների ազատականացման հաջորդ փուլին՝ Վիզաների երկխոսության Հայաստանի անցման և ԵՄ-ից վիզաների ազատականացման գործընթացի համար անհրաժեշտ Գործողությունների պլանի ստացման և իրականացման հարցում:
