10.04.2026 | 14:13
Անդրանիկ Քոչարյանը 44-օրյա պատերազմի զոհերի սխալ թիվ է հնչեցրել՝ պաշտոնական թվից 137-ով ավելի
«Սուրմալու» և «Տաշիր» առևտրի կենտրոնները շարունակում են փակ մնալ
Հասարակություն
21.03.2023 | 14:58
«Սուրմալու» և «Տաշիր» առևտրի կենտրոնները շարունակում են փակ մնալ․ Քաղաքաշինության, տեխնիկական և հրդեհային անվտանգության տեսչական մարմնի խոսնակ Ելենա Զոհրաբյանը Factor.am-ի հետ զրույցում ասաց, որ տնօրինությունը հայտնաբերված խախտումները դեռ չի վերացրել։
«Տաշիր» առևտրի կենտրոնի գործունեությունը դադարեցնելու մասին ՔՏՀԱ տեսչական մարմինը հայտնեց մարտի 7-ին։ Այդ առևտրի կենտրոնում հայտնաբերվել են տեխնիկական և հրդեհային անվտանգության նորմատիվ փաստաթղթերի պահանջների շուրջ երկու տասնյակ խախտումներ։
««Տաշիր» առևտրի կենտրոնը դիմում ներկայացրել էր խախտումները մասնակի վերացնելու մասին, որպեսզի տեսչականը վերաբացման թույլտվության տար, սակայն մերժեցինք․ պիտի վերացվեն հայտնաբերված ողջ խախտումները։ Հիմա նոր դիմում են ներկայացրել, պիտի ստուգենք»,- ասաց Ելենա Զոհրաբյանը։
«Սուրմալու» առևտրի կենտրոնի գործունեությունը դադարեցնելու մասին էլ տեսչականը հայտնեց 16 մարդու կյանք խլած պայթյունից ավելի քան կես տարի անց՝ մարտի 14-ին։ Այս առևտրի կենտրոնում տեխնիկական և հրդեհային անվտանգության նորմատիվ փաստաթղթերի պահանջների շուրջ 5 տասնյակ խախատումներ էին հայտնաբերվել։ Իսկ օգոստոսի 14-ի ողբերգական պայթյունից հետո ստուգումների արդյունքում այս առևտրի կենտրոնում 66 խախտում էր հայտնաբերվել։
Առաջիկայում տեսչականը կհայտարարի խախտումների հիմքով այլ առևտրի կենտրոնների գործունեության դադարեցման մասին, հիմա հրաժարվում են անուններ նշել։
Արփի Հակոբյան
