Ղազախստանի խորհրդարանական ընտրություններում առաջատար է «Ամանաթ» կուսակցությունը․ անկախ դիտորդները հայտնել են խախտումների մասին

Ղազախստանի խորհրդարանական ընտրություններում առաջատար է նախագահամետ «Ամանաթ» կուսակցությունը։ Այսպիսին են exit poll-ի տվյալները։ Դրանց համաձայն՝ կուսակցությունը ստանում է ձայների մոտավորապես 53,5%-ը՝ շատ առաջ անցնելով իր ամենամոտ մրցակիցներից։ «Ամանաթին» հաջորդում է «Աույլ» կուսակցությունը՝ ձայների 10,5 տոկոսով, գրում է Euronews-ը։

Ղազախստանում ընտրությունները տեղի են ունեցել կիրակի՝ մարտի 19-ին։ Դրանք անցկացվել են նոր համակարգով, որը փոփոխվել էր անցած տարվա հունվարին երկրում գրանցված զանգվածային բողոքի ցույցերից հետո։ Բացի այդ, ընտրությունները վաղաժամկետ էին նշանակվել, դրանք պետք է տեղի ունենային 2026 թվականին։

Այժմ պատգամավորներին ընտրում են ոչ միայն կուսակցական ցուցակներով, այլ նաև միամանդատ շրջաններում, իսկ քվեաթերթիկներում հայտնվել է «բոլորին դեմ» տող, նվազեցվել է խորհրդարան մտնելու ստորին շեմը՝ 7-ից իջեցվել է 5 տոկոսի։ Այս փոփոխությունները երկրի ղեկավարությունը ներկայացրել է որպես արդիականացում ու անցում «արդար և մրցունակ» իշխանություն ձևավորելուն ուղղված քայլ։

Գործող իշխանության քննադատները, սակայն, կարծում են, որ սկզբունքային փոփոխություններ տեղի չեն ունեցել։ Այսպիսով, ընտրապայքարում ներգրավված յոթ կուսակցություններից և ոչ մեկը դեռևս չի քննադատում նախագահ Կասիմ-Ժոմարտ Տոկաևին, իսկ առաջատար «Ամանաթ» կուսակցությունը Նուրսուլթան Նազարբաևի հիմնադրած «Նուր-Օթան» կուսակցության իրավահաջորդն է, թեև երկրի ներկայիս ղեկավարը պաշտոնապես հեռացել է կուսակցությունից։

Անկախ դիտորդները ևս հայտնում են կիրակի կայացած քվեարկության ժամանակ խախտումների մասին։

Տաթև Ֆռանգյան