08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Ստամբուլում Նովրուզի տոնակատարության ժամանակ 200-ից ավելի մարդ է ձերբակալվել «անօրինական կարգախոսներ» հնչեցնելու հիմնավորմամբ
Քաղաքականություն
20.03.2023 | 12:27
Թուրքիայի մի քանի նահանգներում հազարավոր մարդիկ նախօրեին հավաքվել են՝ նշելու քրդական Նոր տարին՝ Նովրուզը։ Ստամբուլի Յենիքափը հրապարակում այս առիթով հավաք է կազմակերպվել քրդամետ Ժողովուրդների դեմոկրատական կուսակցության (HDP) համանախագահ Փերվին Բուլդանի, հասարակական կազմակերպությունների և քաղաքական կուսակցությունների բազմաթիվ այլ ներկայացուցիչների մասնակցությամբ։
Թուրքական լրատվամիջոցների հաղորդմամբ՝ Ստամբուլի նահանգապետարանի հայտարարության համաձայն 224 մարդ է ձերբակալվել միջոցառման ժամանակ «անօրինական պաստառներ բերելու և անօրինական կարգախոսներ բացականչելու» հիմքով։ Հավաքի մասնակիցները նաև կառավարության հրաժարականի կոչեր են հնչեցրել՝ բացականչելով «Ազատություն Սելոյին», նկատի ունենալով բանտարկված HDP-ի նախկին համանախագահ Սելահաթթին Դեմիրթաշին։
HDP-ն ներկայացնող Ստամբուլից ընտրված պատգամավոր Զուլեյհա Գյուլումը լրատվամիջոցներին ասել է, որ Նովրուզի տոնակատարությունների ժամանակ մարդու իրավունքների բազմաթիվ խախտումներ են եղել։ Գյուլումի խոսքով՝ ավանդական հագուստ կրող քաղաքացիներին արգելվել է մուտք գործել տարածք, խնդրել են փոխել հագուստը։ Նովրուզը նշվել է նաև Թուրքիայի շատ այլ նահանգներում: Մայրաքաղաք Անկարայում ոստիկանությունը թույլ չի տվել քաղաքական կուսակցությունների պաստառներ բերել տարածք։
Էմմա Չոբանյան
