15.08.2026 | 21:02
Վահան Կոստանյանը Զելենսկիին է փոխանցել ՀՀ բարձրագույն ղեկավարության շնորհավորանքները
Ադրբեջանի Մեջլիսը դատապարտել է Եվրախորհրդարանի բանաձևը, որում անդրադարձ կա ԼՂ հակամարտությանը
Քաղաքականություն
17.03.2023 | 13:47
Ադրբեջանի Միլլի Մեջլիսի արտաքին հարաբերությունների և միջխորհրդարանական հարաբերությունների հանձնաժողովը խստորեն բողոքել և դատապարտել է մարտի 15-ին Եվրախորհրդարանի կողմից «Եվրամիության և Ադրբեջանի հարաբերությունների վերաբերյալ» ընդունված բանաձևը։
Բաքվին դուր չեն եկել ինչպես բանաձևում առկա Ադրբեջանում մարդու իրավունքների վատթար իրավիճակի, այնպես էլ Լեռնային Ղարաբաղին վերաբերող դրույթները։
«Եվրախորհրդարանը ոչ միայն չկարողացավ կանխել այս բանաձևի ընդունումը, որը վնասել է նրա հեղինակությանը, այլև դարձել այն ուժերի գործիքը, որոնք փորձում են իրագործել իրենց ստոր ծրագրերը Հարավային Կովկասի տարածաշրջանում քաոսի ու պատերազմի միջոցով: Եվ դա խորը հիասթափություն ու զայրույթ է առաջացնում»,- ասվում է Մեջլիսի հայտարարության մեջ։
Նշվում է, որ այս բանաձևը կասկածի տակ է դնում Ադրբեջանի տարածքային ամբողջականությունը, ինչը բացարձակ անհարգալից վերաբերմունք է ինչպես միջազգային իրավունքի, այնպես էլ այդ կառույցի կանոնադրության նկատմամբ։
«Ամենակարևորն այն է, որ փաստաթղթի՝ այս տեսքով ընդունումը, անկասկած, հստակ վկայում է, որ այն գալիս է Հայաստանից և Եվրոպայի քաղցկեղային ուռուցքը դարձած հայկական սփյուռքից»,- ասվում է հայտարարության մեջ, որով ևս մեկ անգամ Բաքուն ի ցույց է դնում իր քաղաքականության հայատյաց բնույթը։
Հավելենք, որ Եվրախորհրդարանի ընդունած բանաձևում անդրադարձ կա Ադրբեջանում մարդու իրավունքների, ԶԼՄ-ների, քաղբանտարկյալների, կանանց նկատմամբ բռնության, Ադրբեջանի և Հայաստանի հարաբերությունների, Լեռնային Ղարաբաղի հակամարտության, ինչպես նաև էներգառեսուրսների Արևմուտք տեղափոխման խնդիրներին։ Բանաձևում Եվրախորհրդարանը նաև կոչ է անում պատժամիջոցներ կիրառել Ադրբեջանում մարդու իրավունքների կոպիտ խախտման մեջ ներգրավված պաշտոնյաների նկատմամբ։
Էմմա Չոբանյան
