Ադրբեջանի հարձակումը ԼՂ-ի վրա լինելու է՝ ռուս-ադրբեջանական հատուկ գործողություն․ առանց Կրեմլի թույլտվության չի՛ անի․ Հովսեփ Խուրշուդյան. ՏԵՍԱՆՅՈՒԹ

Ադրբեջանի կողմից Հայաստանի և Լեռնային Ղարաբաղի սահմանների ուղղությամբ էսկալացիայի վտանգի մասին հայտարարած Նիկոլ Փաշինյանն այսօր էլ Կառավարության նիստում ասաց՝ Ադրբեջանը ԼՂ-ի հետ շփման գծում ռազմական դրությունը սրելուն ուղղված կոնկրետ գործողություններ է կատարում, մարտի 5-ին սպանվել են 3 ոստիկաններ։ Բացի այդ՝ Ադրբեջանը ԼՂ-ի վրա հարձակման լրատվական ֆոն է ստեղծում։ Բայց սրա մասին բաց ասել է նաև Ադրբեջանի ՊՆ-ն, որ եթե ինտեգրման օրակարգը ԼՂ-ն չընդունի, կոշտ քայլեր կլինեն։

Ադրբեջանը կգնա՞ ռազմական իրավիճակը սրելու ճանապարհով։ «Ազատ քաղաքացի» ՀԿ ղեկավար Հովսեփ Խուրշուդյանը Factor TV-ին տված հարցազրույցում ասում է, որ Ադրբեջանն ինքնուրույն չի կարող նման որոշում կայացնել։

«Ինքն ունի հովանավորներ՝ ռազմական նման գործողություններ իրականացնելու, ինչը եղավ և՛ քառօրյա պատերազմի, և՛ 44-օրյայի ժամանակ։ Մենք տեսնում ենք՝ Իսրայելի բարձրաստիճան անվտանգային և պաշտպանական պաշտոնյաների այցեր եղան Բաքու, սրվում են Իրանի և Ադրբեջանի միջև հարաբերությունները, տասնյակ իրանամետ անձանց՝ նրանց իրանական շպիոններ են անվանում։ Իրանը բերում է իր զորքերը առաջին կարգի պատրաստականության։ Սա զուտ հայկական հարց չէ։ Ես ունեմ մտահոգություն, որ սա կարող է 44-օրյայի դրդապատճառների կրկնությունը լինել, երբ որոշ ուժեր աչք փակեցին Ադրբեջանի քայլերի վրա ԼՂ-ի դեմ, որովհետև պլանը Իրանն էր։ Հիմա ՌԴ-ն է շահագրգիռ էսկալացիայի մեջ, որ ՀՀ-ում բերի-դնի իրեն ենթակա ռեժիմ, որովհետև մտահոգ է, որ քայլ առ քայլ ՀՀ-ն չի ենթարկվում իր ճնշումներին, չի զոհաբերում այն, ինչ ՌԴ-ն է պահանջում»,- ասաց Հովսեփ Խուրշուդյանը։

Հարցազրույցն ամբողջությամբ՝ տեսանյութում։

Ռոբերտ Անանյան