16.05.2026 | 11:33
Քաղաքների մթնոլորտային օդում փոշու պարունակությունը մայիսի 2-8-ը
Պապիկյանի սենսացիոն հայտարարությունը. որտեղի՞ց է ղեկավարվում 5-րդ շարասյունը․ ՏԵՍԱՆՅՈւԹ
Քաղաքականություն
15.03.2023 | 20:40
Հայաստանը 5-րդ շարասյան գործունեության պատճառով է պարտվել 44-օրյա պատերազմում։ Երեկ հրավիրված մամուլի ասուլիսի ընթացքում այսպիսի հայտարարություն արեց Նիկոլ Փաշինյանը։ Այս շարասյունը փորձեր է անում տապալել Հայաստանի առաջընթացները գրեթե բոլոր ոլորտներում՝ պնդեց վարչապետը։
Այսօր արդեն Փաշինյանի թիմակիցների ներկայությամբ պաշտպանության նախարար Սուրեն Պապիկյանը մասնավորեցրեց ոլորտները, թե որտեղ է գործում, ըստ ՔՊ-ի՝ Հայաստանի խնդիրների մեղավոր 5-րդ շարասյունը։
«Երեկ ես տեղեկություններ եմ կարդում, որ հակառակորդի ռազմական տեխնիկան Տավուշում է: Ո՞րն է սրա նպատակը, եթե սա չի ուղղորդվում այլ երկրից: Ընդ որում, կապ չունի՝ որ երկրից: Կապ չունի՝ 5-րդ շարասյունը կամ դրան աջակցողներն ինչ պաշտոն են զբաղեցնում, ընդդիմադիր են, թե՝ սովորական քաղաքացիներ են, գուցե լրագրող են, ես չգիտեմ: Ամեն դեպքում՝ ի վնաս Հայաստանի է»,- ասաց Պապիկյանը:
Պարագլուխների անուններ նա չտվեց, բայց սենսացիոն հայտարարություն արեց․ Հայաստանի ռազմական գերատեսչության ղեկավարը դրսի ուժերին մեղադրում է բանակը խարխլելու համար։
Փաշինյանին և մյուս ՔՊ-ականներին որտեղի՞ց այս տեղեկությունները՝ հետաքրքրվեցինք պաշտոնը երեք տարի առաջ ստանձնելուց հետո այսօր առաջին անգամ խորհրդարան ժամանած ԱԱԾ տնօրեն Արմեն Աբազյանից։ Հատուկ ծառայության ղեկավարը հեռացավ՝ 5-րդ շարասյան ու գործակալական ցանցերի մասին հարցերն անպատասխան թողնելով։
5-րդ շարասյան մասին իշխանականների հայտարարություններն անհանգստացնում են ընդդիմությանը։ Նրանք առաջարկում են այդ մասին քիչ խոսել։
Աժ ընդդիմադիր «Հայաստան» խմբակցության պատգամավոր Աննա Գրիգորյանը հիշեցնում է՝ Հայաստանի 140 քառ․ կմ օկուպացված տարածքում Ադրբեջանն արդեն ճանապարհներ ու խրամատներ է կառուցում, ի՞նչ է անում ՀՀ իշխանությունը։
Սուրեն Պապիկյանը, անցում կատարելով ձեռք բերված սպառազինությանը, նշեց՝ 2022-ին Հայաստանի զինված ուժերը համալրվել է ԱԹՍ-ներով և հակատանկային ու ՀՕՊ միջոցներով, թրթուրավոր և անվավոր ինժեներական տեխնիկայով, ականազերծման լրակազմով, քողարկման ցանցերով։ Նախարարը, Factor TV-ի հարցին ի պատասխան, անուղղակի հաստատեց Հնդկաստանից զենքի գնման մասին տեղեկությունները։
Այդուհանդերձ, այս ամենի ֆոնին մտահոգություններ կան՝ արդյո՞ք ՀՀ-ն պատրաստ է, հարկ եղած դեպքում, դիմակայել ադրբեջանական ռազմական ագրեսիային։ Նիկոլ Փաշինյանը երեկ հայտարարել էր ռազմական էսկալացիայի շատ մեծ հավանականության մասին, ինչն այսօր վերահաստատեց պաշտպանության նախարարը։
ԱԺ «Պատիվ ունեմ» խմբակցության պատգամավոր Տիգրան Աբրահամյանի խոսքով՝ հասկանալու համար՝ այս իշխանությունն ի վիճակի՞ է դիմակայել ադրբեջանական ագրեսիային, պետք է նայել, թե ՔՊ-ի օրոք ռազմական բախումներն ինչ ելքեր են ունեցել։
Նշենք, որ չնայած իշխանությունների հայտարարություններին՝ դեռևս դատարանի վճռով որևէ մեկը պատասխանատվության չի ենթարկվել պետական դավաճանության հոդվածով։ Թեև ԱԱԾ-ն հայտարարում է դավաճանների ձերբակալությունների մասին, սակայն գործերը դեռևս ավարտական փուլին չեն հասնում։
Մանրամասները՝ տեսանյութում։
Նարեկ Կիրակոսյան
