Դավիթ Գյուրջինյանը նշանակվել է Բրյուսովի անվան պետական համալսարանի ռեկտորի պաշտոնակատար, ուսանողները բողոքի ակցիա են իրականացնում

ԿԳՄՍՆ լեզվի կոմիտեի նախագահ Դավիթ Գյուրջինյանը նշանակվել է Բրյուսովի անվան պետական համալսարանի ռեկտորի պաշտոնակատար: Այս մասին Factor.am-ի հետ զրույցում ասաց բուհի ռեկտորի նախկին պաշտոնակատար Ցոլակ Ակոպյանը:

Նրա խոսքով՝ այսօր առավոտյան են տեղեկացել նշանակման մասին, իսկ 16։30-ին Գյուրջինյանը պիտի ներկայացվի աշխատակազմին։ Գյուրջինյանից և ԿԳՄՍՆ-ից մեզ պարզաբանումներ ստանալ չհաջողվեց։

Այս պահին համալսարանականներն ու աշխատակազմը բողոքի ակցիա են իրականացնում, նրանք դեմ են Գյուրջինյանի նշանակմանը։

Հիշեցնենք՝ Բրյուսովի անվան համալսարանում 2022 թվականի դեկտեմբերի 9-ին անցակցվել էին ռեկտորի ընտրություններ։ Թեկնածուները երկուսն էին՝ գործող ռեկտոր Կարինե Հարությունյանն ու Լեզվի կոմիտեի նախագահ Դավիթ Գյուրջինյանը: 12 ձայնով ռեկտորի պաշտոնում վերընտրվել էր Կարինե Հարությունյանը։ Դավիթ Գյուրջինյանը հավաքել էր 8 ձայն։ Խորհրդի կազմում ներառված էին Կառավարության 5 ներկայացուցիչ, Լիազոր մարմնի՝ ԿԳՄՍ նախարարության կողմից՝ 5 հոգի, 5 դասախոս և 5 ուսանող։ Հոգաբարձուների խորհրդի նախագահը փոխվարչապետ Համաբարձում Մաթևոսյանն էր, բայց ընտրություններից հետո թե՛ նա, թե՛ ԿԳՄՍ նախարար Վահրամ Դումանյանն հրաժարվեցին պաշտոններից։ Թեև նրանց հրաժարականի վերաբերյալ որևէ պատճառաբանություն չնշվեց, սակայն, մասնագետները դա կապեցին համալսարանի ռեկտորի ընտրության արդյունքների հետ: Կարինե Հարությունյանի՝ռեկտորի պաշտոնում ընտրվելու արդյունքները Կառավարությունը չէր հաստատել։

Արփի Հակոբյան