12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Ալիևը Շոլցի հետ ասուլիսում խոսել է Լաչինի միջանցքից և Հայաստանի հետ խաղաղության պայմանագրից
Քաղաքականություն
14.03.2023 | 18:57
Ադրբեջանի նախագահ Իլհամ Ալիևը Բեռլին կատարած այցի ընթացքում կանցլեր Օլաֆ Շոլցի հետ մամուլի ասուլիսում կրկին ստահոդ թեզեր է հնչեցրել և խոսելով Հայաստանի հետ խաղաղության պայմանագրից՝ ի ցույց դրել Բաքվի առավելապաշտական նկրտումները։
«Խաղաղության համաձայնագրի ստորագրման նախաձեռնությունը, որը ներառում է հինգ սկզբունք, առաջ է քաշել Ադրբեջանը, և այդ սկզբունքների հիման վրա կարող է խաղաղության պայմանագիր կնքվել երկու երկրների միջև»,- ասել է Ալիևը՝ նշելով, որ Հայաստանը չպետք է բաց թողնի այդ հնարավորությունը։
Բացի այդ՝ նա արդարացրել է Արցախյան 44-օրյա պատերազմը, Բաքվի կողմից ռազմական ուժի կիրառումը՝ նշելով, որ «Հայաստանին պարտության են մատնել» ու հեռացրել՝ «ապացուցելով, որ Ղարաբաղն Ադրբեջան է»։
Անտեսելով ՄԱԿ-ի Արդարադատության միջազգային դատարանի որոշումը՝ Ալիևը կրկին պնդել է, թե Լաչինի միջանցքը փակ չէ։ Նա նաև նշել է, որ Ադրբեջանն աջակցում է ԵՄ նախագահ Շառլ Միշելին ու Բրյուսելյան խաղաղության օրակարգը։
«Ադրբեջանի դիրքորոշումը բաղկացած է երկու մոտեցումներից. առաջին մոտեցումը Ադրբեջանի և Հայաստանի միջև խաղաղության համաձայնագրի ստորագրումն է, երկրորդ մոտեցումը՝ «Ադրբեջանի Ղարաբաղի հայ բնակիչների հետ երկխոսության» իրականացումը»,- ասել է Ադրբեջանի նախագահը։
Էմմա Չոբանյան
