Հայաստանը միջազգային գործընկերների ավելի լայն շրջանակի կարիք ունի, քան կա այսօր. Ռասմուսեն․ ՏԵՍԱՆՅՈՒԹ

«Մեր նպատակն է սերտ համագործակցություն ունենալ Հայաստանի կառավարության հետ, դա լայն շրջանակ և խնդիրներ ընդգրկող համագործակցություն է»,- այսօր լրագրողների հետ զրույցում այս մասին նշեց երկօրյա այցով Հայաստան ժամանած «Ռասմուսեն Գլոբալ» միջազգային քաղաքական խորհրդատվական կազմակերպության հիմնադիր նախագահ և ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը։

«Ակնհայտ է, որ մենք խոսում ենք Եվրամիության քաղաքական աջակցության մասին: Կարծում եմ, որ առաջին հերթին այստեղ և հիմա կարևոր է, որ մենք բարձրացնենք տեղեկացվածությունն այն մասին, որ Լեռնային Ղարաբաղում հումանիտար ճգնաժամ կա, իսկ միջազգային հանրությունը պետք է առավելագույն ճնշում գործադրի Ադրբեջանի վրա իրավիճակը կարգավորելու համար:

Մենք կցանկանայինք նաև օգնել Հայաստանի կառավարությանը բարձրացնելու Եվրամիության հետ քաղաքական երկխոսության մակարդակը և դա ներառում է նաև երկխոսություն անվտանգության քաղաքականության վերաբերյալ: Եվրամիությունն ունի գործիքների լայն շրջանակ, որոնք կարող են օգտակար լինել Հայաստանի համար և ես կարծում եմ, որ Հայաստանին անհրաժեշտ է միջազգային գործընկերների շատ ավելի լայն շրջանակ, քան ունի այսօր», – նշեց Ռասմուսենը:

Հարցին՝ ռազմաքաղաքական աջակցության ակնկալիք Հայաստանը հայտնե՞լ է, նա պատասխանեց. – «Ընդհանուր առմամբ, այո, սակայն մենք ռազմական աջակցության վերաբերյալ մանրամասներ չենք քննարկել»:

Մանրամասները՝ տեսանյութում։