Պեսկովը հայտարարել է, որ ՌԴ-ն չի ճանաչում Հաագայի միջազգային քրեական դատարանի իրավասությունը

Ռուսաստանը չի ճանաչում Հաագայի միջազգային քրեական դատարանի (ՄՔԴ) իրավասությունը։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով ռուսական կողմի դեմ հնարավոր քրեական գործի հարուցումը, գրում է DW-ի ռուսական ծառայությունը։

The New York Times-ն ավելի վաղ հայտնել էր, որ Հաագայի դատարանը մտադիր է ռազմական հանցագործությունների վերաբերյալ երկու գործ հարուցել՝ կապված Ուկրաինա ռուսական ներխուժման հետ, ինչպես նաև խնդրելու է մի քանի անձանց ձերբակալության օրդեր։

Հաղորդագրության համաձայն՝ գործերից մեկը կապված է «ուկրաինացի երեխաների դիտավորյալ առևանգման ու հարկադիր կերպով վերադաստիարակման ճամբարներ ուղարկելու հետ»։ Երկրորդը վերաբերում է Ուկրաինայի քաղաքացիական ենթակառուցվածքներին դիտավորյալ հարվածներին։ Սա կարող է դառնալ Ուկրաինայում ենթադրյալ հանցագործությունների համար ռուս պաշտոնյաներին միջազգային դատարանում պատասխանատվության ենթարկելու առաջին փորձը:

Թե կոնկրետ ում մեղադրանք կառաջադրվի, դեռևս պարզ չէ։ Որոշ փորձագետներ չեն բացառում, որ նախագահ Պուտինն ինքը կարող է դառնալ մեղադրյալ, քանի որ ՄՔԴ-ն չի ճանաչում պետության ղեկավարի անձեռնմխելիությունը ռազմական հանցագործությունների հետ կապված գործերում։

Դաշնային խորհրդի փոխխոսնակ Կոնստանտին Կոսաչովը նույնպես նախօրեին մատնանշել էր, որ «ՄՔԴ-ն Ռուսաստանի նկատմամբ իրավասության չունի»։

«2016 թվականից Ռուսաստանը չի հանդիսանում 1998 թվականի Հռոմի ստատուտի կողմ, ինչը նշանակում է, որ ՄՔԴ-ն իրավասություն չունի մեր երկրի նկատմամբ»,- գրել է սենատորը Telegram-ի իր ալիքում։

Տաթև Ֆռանգյան