Թեհրանն արձագանքել է Բաքվի բողոքներին

Իրանի ԱԳՆ-ն արձագանքել է Ադրբեջանի բողոքներին՝ երկու երկրների պետական սահմանի երկայնքով իրանական ռազմական ինքնաթիռի թռիչքի հետ կապված։ Մասնավորապես, Իրանի ԱԳՆ մամուլի խոսնակ Նասեր Քանանին հայտարարել է, որ դա եղել է սովորական թռիչք, որը պարբերաբար իրականացվում է Իրանի սահմանային տարածքների և երկրի ներսում մոնիթորինգի շրջանակում, գրում է Mehr գործակալությունը։

«Նման թռիչքներ նախկինում էլ են իրականացվել։ Ճշգրիտ տվյալների հիման վրա ինքնաթիռի թռիչքը տեղի է ունեցել ընդհանուր սահմանին զուգահեռ և Իրանի տարածքում՝ ադրբեջանական կողմի սահմանից համապատասխան հեռավորությամբ։ Երբ տեղի են ունենում միջադեպեր ու տեխնիակական սխալներ, սովորաբար ռադարներն ու պաշտպանական համակարգերն անհրաժեշտ նախազգուշացումներ են տալիս»,- ասել է Քանանին։

Նա հավելել է, որ իրանական ռազմական ինքնաթիռի այս թռիչքի հետ կապված որևէ ռադարային կամ ռադիոնախազգուշացում չի տրվել, ինչը վկայում է այն մասին, որ սխալ թույլ չի տրվել։

«Մենք համագործակցում ենք Ադրբեջանի հետ այս ոլորտում, ինչպես նաև պաշտպանության ոլորտում։ Մենք հարաբերություններ ունենք, մեր դեսպանատունն ակտիվ է, մեր ռազմական կցորդը ներկա է: Եթե այս առումով բարի կամք լիներ, ապա մեր ռազմական կցորդի մասնակցությամբ հարցը կարող էր արծարծվել մեր երկրի դեսպանատան հետ, նույն շրջանակում կարծիքներ կփոխանակվեին, թյուրիմացությունները կհարթվեին»,- նշել է իրանցի դիվանագետը։

Ըստ նրա՝ Թեհրանը չի կարող Իրանին դեսպանին ԱԳՆ կանչելու՝ Ադրբեջանի իշխանությունների քայլը համարել որպես բարեխիղճ գործողություն։

«Մենք հարևաններ ենք Ադրբեջանի հետ և միմյանց պատմական թևերն ենք հարևան տարածաշրջանում։ Նման հարցերում, բնականաբար, ակնկալվում է ազնիվ փոխգործակցություն։ Մենք ակնկալում ենք, որ այդ հարցերը կբարձրացվեն և կլուծվեն  մասնագիտացված շրջանակներում։ Մենք նաև շեշտում ենք, որ լրատվամիջոցներում հարցերի բարձրացումը չի օգնի լուծել խնդիրները, և դա բարի կամքի դրսևորում չէ»,- շեշտել է Նասեր Քանանին։

Էմմա Չոբանյան